Formato txikiko mitina
Gaur arratsaldeko 19:45ak aldera eman du mitina Etxebizitza eta Gizarte Gaietako sailburuak. Aukeratutako lekua Areetako Xake plaza izan da. Baina, bertan EAJ/EA koalizioak aurreko egunean ehundaka pertsona batu bazituen, Ezker Batuak-Berdeen koordinatzaileak 200 bat pertsona batu ditu plazan, batez ere tren-txikian eta haurrentzako gazteluetan. Mitinean bertan 60 bat pertsona egon dira, haietako asko kazetariak. Gutxienez, alderdikideen babesa izan du Madrazok. Besteak beste, Madrazoren arabera “Udalean gogor lan egiten duen” Aitor Lafuente Alderdien Legearen ondorioz Getxoko Udaleko zinegotzia, Omer Oke Inmigrazio zuzendaria eta Ruben Belandia Bizkaiko zerrendakide leioztarra.
Areetan Ezker Batua-Berdeak-entzako botoa eskatzean, Madrazok enplegua, euskara eta etxebizitza arloen egitasmoak zehaztu ditu. Enpleguari dagokionez, EB-Bk proposatutako enpleguaren aldeko hitzarmena onartzekotan, 20.000 lanpostu finko eta eskubideekin sortuko lirateke bere iritziz. Euskara arloan konpromezu pertsonala hartu du sailburuak: “nik hemendik bi urtetara euskaraz berba egiteko konpromezua hartu dut eta orain hor nabil, ikasten”. Berriz, publiko artean arrakasta gehien izan duen eskaintza etxebizitzaren ingurukoa izan da. Izan ere, Santa Eugenia kaleko Babes Ofizialeko Etxebizitzak (BOE) 2006an zozketatuko direla zehaztu du, hasieran; Zubilletan 365 etxebizitzetatik 125 BOE izango direla eta 2007an zozketatuko direla gaineratuz eta, bukatzeko, Madrazok Martitturrin, Azkorrin, Moreagan eta bestelako Getxoko landetan errekalifikazio handiak egingo direla iragarri du eta bertan kokatu du Getxon eraikiko diren 5.000 BOE.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun