"Euskara ikasi, erabili, bizi eta hitz egiteko beharraren arrazoia edo zergaitia" da, Aitzpea Goenaga egilearen hitzetan, "Euskararen 7 bekatu nagusiak" obraren mamia. Goenagaren testuak, euskarak egunerokotasunean sortzen dituen hainbat egoera bitxiren- eta askotan larriren- isla egiten du, umorez, ironiaz, zorroztasunez jolastuz, baina euskararen inguruko arazoak mahai gainean jarri eta jorratuz, erantzunik eman gabe. Izan ere, ikusle bakoitzak bere ondorioak ateratzea da obraren helburua.
Zazpi istorio labur
Horrela bada, egileak zazpi bekatu nagusiak (amorrua, lizunkeria, zuhurkeria, bekaizkeria, nagikeria, hantustea eta tripazainkeria) baliatu ditu, istorio banatan euskarara ekarrita. Beraz, hamarren bat minutuko zazpi esketxek osatzen dute ikuskaria.
Istorio batetik bestera saltoa egiteko, argi aldaketa eta musika trantsizioak erabiliko dituzte, baina horrekin batera grabazio bat proiektatuko da eszenatokian egongo den pantaila batean. Ikus-entzunezko horretan Donostiako ikastetxe bateko haurrak agertuko dira euskararen inguruko hainbat galderari erantzuten. Esan barik doa haurren naturaltasunak eta iritzi bitxiek piperra eta gatza erantsiko dizkiotela une batzutan parodiara era gerturatzen den antzezlan umoretsu eta zorrotzari.
Aitzpea Goenagak idatzi eta POK produkzioak ekoizpen etxeak propio Korrika-AEK Bekarako landu zuen (baita irabazi ere) "Euskararen 7 bekatu nagusiak" antzezlana egongo da ikusgai ostegun honetan, 20:00etatik aurrera, Erandioko Bekoa ikastetxean. Zazpi pekatu nagusiak euskal munduko egoera desberdinei aplikatzen dizkion ikuskizun arina da, pekatu bakoitzeko atal banatan banatuta. Esan bezala, Aitzpea Goenagarena da testua eta Olatz Beobide eta Edi Naudok zuzenduko dute. Oholtza gainean hiru aktore arituko dira: Niko Lizeaga, Mikel Laskurain eta Lierni Fresnedo. Gonbidapenak Erandioko Udaleko Euskara Zerbitzuan eskura daitezke.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun