Astelehenean abiatu zen Euskal Zinemaren Asteak amaitzera bidean doa. Orain arte ugariak izan dira Kultur Leioan eskainitako proiekzio eta solasaldiak; baina, oraindik, zer ikusi eta entzun geratzen da igandera bitartean. Besteak beste, larunbatean, “Euskarazko zinemagintzaren egoera gaur” izenburuko hitzaldia emango dute 19:00etatik aurrera Telmo Esnal eta Asier Altuna "Aupa Etxebeste" filmaren zuzendariek. Ordu t'erdi beranduago, berriz, "Txotx", "Berrogei ezetz", "Topeka" eta "Amuak" laburmetraiak egongo dira ikusgai kultur aretoko auditorioan, 2 euroren truke.
Azkenik, igandean, bi filmeren proiekzioak emango die amaiera jardunaldiei. Neska-mutilentzako "George eta herensugea" emango dute bi saiotan; bata 12:00etan eta bestea 17:00etan. Eta, arratsaldeko zortzietan, "Ke arteko egunak" egongo da ikusgai. Emanaldi hauen sarreren prezioa ere 2 eurokoa da. Azkenik, ez ahaztu "Euskarazko pelikulen kartelak" izenburuko erakusketa ere badagoela ikusgai bertan azken egunera bitartean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun