Orain pare bat asteburu egindako martxaren ostean, pozik azaldu ziren Lutxana Existe auzo-elkarteko kideek, horrek izandako parte hartzearekin. "Auzoa esnatzea lortu dute", adierazi zuten orduan. Izan ere, hogei urtetan auzotarrek egin duten lehenengo manifestazioa izan zen apirilaren 9koa eta "Erandio Lutxana al da?" leloa aukeratu zuten antolatzaileek. Lutxanak bizi duen utzikeriaz gain, "udal agintariekin euren erreibindikazioak azaltzeko bilerak eduki arren", arazoei konponbiderik jartzen ez dietela salatu zuten. Gaur egun, 360 lagun inguru dauzka auzoak.
Arazo ugari
Besteak beste, Pinturas Internacional lantegia zenekoan hondakin toxikoak pilatzen direla, Enekuri eta Lutxana arteko hondakintegiak ez dituela osasun eta segurtasun neurriak betetzen, oinezkoek bizia arriskuan jarri behar dutela Erandio Bekoarantz zein Bilborantz joateko, espaloirik ere ez daukatela eta daudenak egoera tamalgarrian daudela, Asua itsasadarraren inguruko enpresek isurketa toxikoak egiten dituztela, hormigoizko hormez inguratutako bizpahiru orubeetan era guztietako animaliak batzen direla, ibilgailuetan lapurretak ugaritu egin direla, errepideetan abiadura moteltzeko seinalerik ere ez dagoela eta beste hainbat arazo aipatzen dituzte Lutxana Existe auzo-elkarteko kideek.
Lutxanak dituen arazo eta gabeziei konponbidea bilatzeko konpromisoa iragarri du Mikel Arieta-Araunabeña Erandioko alkateak, bide batez, auzotarrek salatutakoa egia dela aitortuz. Hain zuzen ere, Lutxana Existe izeneko elkartea eratu dute bertoko bizilagunek, udal agintariek "auzoa guztiz baztertuta" daukatela salatzeko. Apirilaren 9an, udaletxe aurreraino egindako manifestazioan 130 bat lagun bildu ziren guztira. Mobilizazioen aurretik, dagoeneko egoera aztertzen ari zirela adierazi du Arieta-Araunabeñak. Hala ere, "pazientzia" izateko eskatu die auzotarrei alkateak, "denbora behar delako arazoak konpontzeko".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun