Asteazkeneko 23:00ak aldera izandako lur-jausiaren ondorioz, etxetik kanpo eman dute gaua Arkotxa kaleko 27. atariko zortzi familiek. Bertan, babes ofizialeko 36 etxebizitza eraikitzen ari da Eusko Jaurlaritza eta beste 14 Getxoko Udala. Hain zuzen ere, azken horiek egiteko obren alboan izan da ezbeharra. Dena den, "arduragabekeriarik ez" dela egon eta luizia "azken egunetako euriteek" eragin dutela adierazi du Andres Uriarte Hirigintza zinegotziak. Iñaki Zarraoa alkateak, bere aldetik, bizilagunek euren etxebizitzak "uztera behartuak izan ez" direla argitu nahi izan du. "Gertaeraren ostean bertan teknikariek egindako txostenaren arabera, eraikinaren egiturak ez du inolako kalterik, ez dago arriskurik beraz. Baina, bizilagunen ezinegona ikusita, gaua hotelean igarotzea eskaini genien", azaldu du udal agintariak. Gauzak horrela, zortzi familietatik bostek (11 lagun) Igeretxen hartu dute ostatu eta gainontzekoek senideen etxean. "Prebentzio neurri bezala, eta batez ere auzokideen lasaitasunerako", gaur ere etxetik kanpo igaroko dute gaua, bihar egoera berriro aztertu bitartean.
Udal arduradunek azaldu dutenez, asteazken goizean antzeman ziren lehendabiziko lur-jausiak Getxoko Udala etxebizitzak egiten ari den orubetik hurbil, Arkotxa kaleko 27. atari parean. Udal arkitektoak eraikin horretan kalterik ez zegoela ondorioztatu zuen azterketa egin ostean. Gaur bertan, lur eremuetan aditua den enpresa pribatua deitu dute udal arduradunek, arazoa konpontzea ahalbidetuko duen eraikitze sistemaren gaineko ikerketa egiteko. "Bide batez, kanpoko beste irizpide bat izateko", Andres Uriartek adierazi duenez. Gainera, gertaeraren aurrean "inolako erantzukizunik ez dauka Udalak", Hirigintza zinegotziaren hitzetan. "Construcciones Urrutiak obrak bukatutakoan geratzen dira gure eskuetan etxebizitza berri horiek", azaldu du. Are gehiago, Arkotxa kaleko 27. atariko bizilagunei ostatua emateko gastuak ere aipatu "enpresaren edo bere aseguru-etxearen ardura" izango dira, Zarraoak jakinarazi duenez. Bitartean, auzotarrek euren etxeetara sartzerik badaukate, "arriskurik ez baitago" udal agintariek jakinarazitakoaren arabera. Arazoa "15 eta 30 egun bitartean" konpontzea espero dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun