Oraindik ere gertatu daitezkeen lur-jausi txikiek bertan lanean ari diren beharginei kalterik ez eragiteko, txosten teknikoa egin duen enpresak neurri batzuk hartzea gomendatzen du; "babes hezia jartzea", besteak beste, Andres Uriarte Hirigintza zinegotziak azaldu duenez. Horretaz gain, "babes ofizialeko etxebizitzak eraiki ahala", jausi egin den banaketa hormaren ordez beste bat altxatuko dute. Pareta horri eusteko txostenak ez du inolako gomendio berezirik egiten, udal arduradunen hitzetan. Bestalde, ezpondaren goiko partea hustu egingo dute, lur-jausi txikiak geldiarazteko.
Gaiaren ingurukon berriak:
Lur-jausiaren ondorioz, etxetik kanpo daude zortzi familia (2005 Api 21)
"Lasaitua har dezaten", gutxienez, astelehenera arte eskaini die Igeretxe hotelean gaua igarotzea Getxoko Udalak, asteazkenean izandako lur-jausitik hurbil, Arkotxa kaleko 27. atarian bizi diren zortzi familiei. Izan ere, Iñaki Zarraoa alkateak goizean adierazi duenez, arazoa udal arkitektoek aurrikusitakoa baino "askoz arinagoa" dela argitu du kalteak aztertzen aritu den enpresa espezializatuaren txosten teknikoak, "lehenik eta behin lurrak asentatu beharko zirela uste baitzuten horiek". Azterketaren ondorioen arabera, "inolako arriskurik ez dago" bertan dagoen etxearentzat, ezta bere bizilagunentzat ere, "ez delako agertu kezka eragin dezaketen arrakalarik". Gainera, babes ofizialeko etxebizitzak eraikitzeko lanek "ia ia berehala" segitu ahal izango dutela aurrera ere adierazten du txostenak. Bitartean, auzokideei ondorioen eta egin beharrekoen berri ematen jarraituko dutela azaldu dute udal arduradunek. Astelehenean bertan este batzar bat egingo dute eurekin berriro egoera aztertzeko eta unean-uneko erabakiak hartzeko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun