Bizkaiko Foru Aldundiko Administrazio Publikoko diputatu Iñaki Hidalgok aurtengo eskaintza bizkaitarraren xedea azaldu du gaurko agerraldian: "Sektore honetan lan egiten dugun jende guztia ordezkatua gaude azokan, pabiloi bakarrean. Bizkaian zehar pasio bat ematea, eskaintza osoa, turismo eta kirol ekintza guztiak pabilioi bakarrean biltzea da helburua". Hori lortzeko egindako ahalegina "beldurgarria" izan dela gaineratu du. Halaber, azokaren lehentasuna zein den azaldu du diputatuak: "Lehentasuna bizkaitarroi ematea da, gure gauzarik onenak eta erakargarrienak ezagutu ditzagun eta geure produktuen kontsumitzaile nagusiak izan gaitezen". "Expovacaciones 2005" azokak irauten duen 4 egunetan hainbat ekitaldi eta jarduera izango dira, katak eta dastatzeak, dantzak, abesbatzak, animazioa, lehiaketak, zozketak eta erakusketak antolatu dituzte.
Parte hartzaileak ondokoak izango dira: Aena-Bilboko Aireportua, Athletic Club, Best (Geugaz Jan, Eusko Label, Solan de Cabras, Cafés Baqué, Gremio de Pastelería de Bizkaia, Ardoaren Hirien Sarea, Electrolux), Bilbao Air, Bilbao Basket, Bilbao Kulturaren Zita, Bizkaiko Jauregiak, Bilbao Metropoli 30, Bilbao Urban Circuit, Bizkaia Zubia, Bizkaiko Museoak, Busturialdea Urdaibai, Bilboko Itsasadarra Itsas Museoa, Urkiola Durangaldea, Euskal Kostaldea Bizkaia, Enkartur (Enkarterri turismoa), Gorbeialdea, Inguralde Erakunde Autonomoa (Barakaldoko Udala), Karpin Aventura, Lea Artibai, Minervion (Santurtzi, Barakaldo, Erandio, Trapaga), Ocean World, Bilboko Portua eta Torre Loizaga.
Gero eta turista gehiago
Bestalde, diputatuak jakitera eman duen Bizkaiko Turismoaren Urteko Txostenaren arabera, 1994an % 21,7 turista etorri ziren atzerritik eta iaz % 30,9. Halaber, 739.685 bisitari izan zituen aurreko urtean, 2003 baino % 18,5 gehiago. Datu horiek kontutan hartuz, turismoaren balorazio baikorra egin zuen diputatuak: "Turismoan urtero eman den hazkunde horrek balorazio positiboa merezi du. Aurten ere, ziurrenik, iaz baino turista gehiago etortzea aurreikusten dugu dauden ekitaldi desberdinak kontutan hartuz".
Uribe Kostatik ere egongo da zer ikusi BECeko Turismo eta Aisiaren Azokan
2005ko mai. 10a, 22:37
Bizkaiko aisialdi eta turismoaren eskaintza Bilbao Exhibition Centreko (BEC) 10.500 metro koadro dituen 3. pabiloian bilduko da "Expovacaciones 2005" erakusketaren baitan. Hilaren 12 eta 15 bitartean izango den azokan, 24 erakustoki izango dira guztira "Bizkaia bizi" izenpean. Eskaintza horren erakusle nagusiak kultura, gastronomia, natura, ospakizun eta ekitaldiak izango dira. Uribe Kostako Mankomunitateak eta erakunde horretatik kanpo dauden eskualdeko udalek beraiek erakustokirik ez duten arren, gure artetik egongo da zer ikusi bertan. Besteak beste, Getxo, Sopela, Plentzia (argazkian bertoko pasealekua) eta Gorliz egongo dira ordezkatuta Bizkaia Euskal Kostaldea erakundeko standean. "Minervion" izenpean, berriz, Erandiok edukiko du bere lekua, inguru horretan turismoa bultzatzeko Barakaldo, Santurtzi eta Trapagaraneko tokiko erakundeekin sinatutako hitzarmenari esker. Areeta eta Portugalete lotzen dituen Bizkaiko Zubiak ere erakustokia izango du, baita Bilbao Metropoli 30 erakundeak ere. Lemoiz kenduta, Uribe Kostako udal guztiak dira horren kide.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun