Euskal Herriko Federazioak ez ditu baldintza iraingarriok onartu, eta nahitaezko kontratu antzeko horri muzin egin dio duintasun handia erakutsiz. Horraino ohituta gaudelako edo, dena logikoa. Harritu nauena ordea, Gara egunkarian hile honen bostean Ikusmira delako atalean agertu zen iruzkina izan da. Itzulpenean inongo zentzu aldaketarik gerta ez dadin, bere horretan gaztelaniaz utzi dut hitzez hitz aipatuko dudan iruzkinaren zati hau: Sin un previo reconocimiento político del hecho vasco, que se traduciría en la existencia de un estado propio, el reconocimiento de las selecciones nacionales vascas no deja de ser un bello objetivo, más cerca de la quimera que de la realidad.
Harrigarria da jarrera hau Garan defenditzea, ezker abertzaleak betidanik intsumisio orokorra eta, baita ere, kirol mailakoa bultzatu dituenean. Nik dakidala beti txalotu izan ditu jarrera ausart eta arriskutsu hori hartu duten kirolari apurrak, eta ez du inoiz orain arte horiek ez apoiatzeko estatu propiorik ez dugula delako aitzakia erabili.
Ez da estatu propiorik behar euskal nazioa onartzeko
Nire aldetik, hauxe argi utzi nahiko nuke: ez da estatu propiorik behar euskal nazioa eta bere hainbat ezaugarri onartzeko. Gogoratu munduan badela estaturik gabeko federazio nazionalik: Ipar Irlanda, Eskozia, Gales
Gainera, legeetan adituek behin eta berriz adierazi dute Espainiako oraingo marko autonomikoan guztiz posiblea dela selekzio nazionalak onartzea; arazoa borondate politiko eza da eta ez, ezinbestez, estatu berri baten sorrera.
Edozelan ere, gure kirol selekzioak bermatuko lituzkeen estatu propioa behar beharrezkoa balitz ere, hori ez litzateke sekulan aitzakia izan behar euskal selekzioen erreibindikazioari laguntzarik ez emateko, ez eta gutxiesteko, ezen estaturik gabeko selekzioen onarpenaren bidean, intsumisioa funtsezko tresna baita, eta ezker abertzaleak beti ikusi du horrela. Nazio baten eraikuntza, hain zuzen ere, estatu egoeraren posizioa alde batera utzita, izaera nazionala oinarri izanik proiektuak bultzatuz egiten da. Askatasuna eskuratzeko, aske jokatu behar dugu une honetatik bertatik. Espainolek gure eskubideak onartuko dizkigutelako zain egotea, ezer erreklamatu gabe, hori bai benetako kimera.