Merkataritza,Iturgintza, Metalezko Eraikuntza eta Barrualdeetako Estaldura ikastaroak emango dituzte Leioako Lanbide-Hastapenerako Ikastetxean
Leioako Lanbide-Hastapenerako Ikastetxeak XVII. ikasketa-plana martxan jartzeko lehenengo urratsak eman ditu. Merkataritza laguntzaileak, eta Iturgintza, Metalezko Eraikuntza eta Barrualdeetako Estaldura beharginak trebatuko dituzte. Eusko Jaurlaritzak eta Getxoko eta Leioako Udalek finantzatuta, 16 urtetik goratik izanik, hezkuntza sistema arauta utzi eta lanean eskarmenturik ez duten gazteei daude zuzenduta lau ikastaro berri hauek. Bi ikasturteko iraupena izango dute: lehenengo teorikoa da eta bigarrenean teoria eta enpresetako praktikak uztartuko dituzte. “Lana topatzeko aukera onak izaten dituzte, profilak inguruan dauden lan eskaintzen arabera erabakitzen baitira. Ikasketak burutu ondoren, likasleen %70 inguruk aurkitzen du lana”, adierazi du Iñanki Zarraoa Getxoko alkateak.
Profilak erabakitzerakoan, hainbat irizpide hartzen dira kontuan, tartean Eusko Jaurlaritzaren Hezkuntza Sailaren orientazioa, zentrora hurbiltzen direnen gustoak asetzeko aukera anitzak eskaintzea, dauden ekipamenduak aprobetxatu ahal izatea, urte batetik bestera ikastaroak ez errepikatzea, zentroaren inguru fisikora egokitzea eta ikasketa mota hauek amaitu ondoren goi mailako hezkuntzara pasatzea ahalbideratzen duten ikastaroak izatea. “Horrela, ikasleek zentro honetatik irten ondoren, erdi mailako hezkuntzara joateko aukera izaten dute”, Zarraoak azaldu duenez. Orain bi ikasturte eskaini ziren Merkataritza laguntzaile eta Iturgintza behargin ikastaroak errepikatu egingo dira Lanbide-Hastapenerako Ikastetxea, lan merkatuan oraindik aukerak daudela uste baita. Metalezko Eraikuntza eta Barrualdeetako Estaldura ingurukoak berriak dira, lan egiteko aukerak sor daitezkelakoan baitdaude.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun