Paul BIlbao: "eskubide batzuk zor zaizkigu hizkuntza komunitate bat osatzen dugun heinean"

Paul Bilbao algortarra Hizkuntz Eskubideen Behatokiaren zuzendaria da. "Euskaltzale" aldizkariak egin dion elkarrizketan euskara, Europako Batasunaren Ituna eta euskaldunon eskubideei buruzko hainbat ausnarketa plazaratu ditu: "euskara normaliza daiteke Europako Batasunarekin edo hau gabe. Bizitzaren egunerokotasunean hizkuntza eskubideak urratzen bazaizkit, hor Europako Batasunak ez du zerikusirik. Europako Batasunak legez eskubide batzuk urratzen dizkigu, hori argi dago. Horrek ez du esan nahi hizkuntzaren normalizazioa aurrera eraman ezin daitekeenik. Prozesua galga dezake, baina, bestalde, badira beste hainbat gune non Europako Batasunak ez duen eragin ahalmenik. Beraz, Itunak ez du lagunduko euskalduntze prozesuan, baina ez du oztopatuko ere".