Azokan hainbat espezialitate erakutsiko dira: egurra, beira, larrua, metala, harria, papera, bitxigintza, galdaragintza, etab. Guztira, 22 izango dira Areetan ikusi ahal izango diren eskulangintza arloak. Aurten, Euskal Herri osotik etorritako eskulangileez gain, Leon, Madril, Bartzelona, Asturias, Zaragoza, Kordoba, Ciudad Real, Soria, Toledo, Huesca, Pontevedra, A Coruña, Kantabria, Lleida eta beste hainbat eta hainbat tokitatik etorritako eskulangileak ere ikusi ahal izango dira. Hortaz, jendeak ezagutzen dituen produktuak lor ditzake, baita hain ezagunak ez direnak eta eskulangintza beste era batera ulertzeko bidea ematen dutenak ere. Aurten, gainera, Irlandatik, Portugaletik, Italiatik, Frantziatik eta Kubatik etorritako artisauek parte hartuko dute azokan.
Horren guztiaren bidez azoka ikustera doazenek bilatzen ari direna lor dezakete azokan eta, gainera, eskulanek duten berme eta erakargarritasunarekin. Kalitate handiko produktuak lortu ahal izango dituzte azokara doazenek, bai eskuz eginda daudelako, baita egiteko erabili dituzten materialak kalitate handikoak direlako ere. Produktu hauek bakarrak dira, ez dituzte bi produktu berdin inon aurkituko.
Lehiaketak
Ohi bezala, bi lehiaketa izango dira azokan: stand eta diseinu gainekoak. Produktuen kalitatea eta postuen aurkezpena eta apaindura hobetzeko eskulangileek egiten duten ahalegina saritzen dute hauek, hain zuzen ere. Horrekin batera, urtero erosleen artean egiten dugun zozketa ere egingo dugu aurten ere eta zerbait erosten duten bisitarien artean eskulangintza produktuak zozketatuko dira.
Maiatzaren 27tik 29ra 113 artisauk parte hartuko dute Getxoko XXII Eskulangintza Azokan, EAEko handiena, Getxoko Kultur Etxeko arduradunek adierazi dutenez. Ohi bezala, Areetako Xake plazako 2.500 metro koadroko karpapean erakutsiko dituzte 99 eskulangilek euren lanak. Gainera, Ibaiondo kalean kokatutako gastronomia gunean beste 14 artisau izango dira. Azokaren ordutegia honako hau izango da: 11:00etatik 14:30era eta 17:00etatik 21:30era. Sarrerak 2,50 euroko prezioa du (2 euro erretiratuentzat).
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun