Nazionalismoaz - Unai Brea / kazetaria
2005ko mai. 18a, 12:21
Barregura ematen didate zenbait talde ezkertzalek, aberrien aurkako mezua zabaltzen dutenean. Gizakiok banatzen omen gaituen guztia gaitzetsi guran, muga, bandera, himno eta halakoez txarto esaka ibiltzen dira. Nork bere hizkuntzaz jardutea ere ez zaie ondo begitantzen, hizkuntza hori espainola ez bada behintzat. Nork bere kulturaren alde egitea txarto ikusten dute, kultura hori zapalduta dagoenean batez ere. Bakoitzak bereari eustea gizakiak elkarrengandik urruntzea ei da eurentzat; desberdintasunak aldarrikatzea ez da ona langileriaren askapen borrokan. Azken batean, eskumazale petoek euskal abertzaletasunaz dioten gauza bera esaten dute: nazionalismoa bidaiatuz sendatzen dela, eta halako txorradak. Zein nazionalismo? Espainolena?Konforme. Denok berdinak izan behar bagara, izan gaitezen. Baina denok euskaraz, axola ez badizue. Ze, berdintasuna bilatu behar badugu, nork ezartzen ditu berdintasunaren ezaugarriak? Nik neureari uko egin behar diot, beste batekin parekatzeko? Hark uko egin dio bereari? Kaletik nabilela mailu eta igitaia daukan panfletoa ematen didan komunista horrek, aberriek ezkerreko borrokari egiten dioten kalteaz ohartarazi gura nauen komunista horrek, uko egingo die bere aberriari, bere kultura granespañolari, bere hizkuntzari? Bai zera! Zuek ez dakizue Espainia ez dela aberria? Espainia gauzen berezko egoera da. Espainiar izatea eta espainolez jardutea ez da inongo aberriren alde ekitea, ez da desberdintasunak aldarrikatzea, Espainia eta espainola marka neutroak direlako. Mezua, azken batean, hau da: zatikatzea txarra da, hizkuntza desberdinetan aritzea txarra da, kultura desberdinak egotea txarra da… eta horregatik denok izan behar dugu espainiar peto. Ezkerreko zein eskumako.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun