'Expovacaciones' azokan izandako parte hartzea "arrakastatzat" jo dute Erandion
Maiatzaren 12tik 15era bitartean, Bilbao Exhibition Centren egin zen "Expovacaciones" azokan lortutako emaitzak "pozez" hartu dituzte Erandio (argazkian, Mikel Arieta-Araunabeña udalburua), Barakaldo, Santurtzi eta Trapagarango alkateek. Lau udalerri horiek "Minervion" izeneko erakustoki berezian bat egiten zuten bertan. Uribe Kostako herrian gaur goizean emandako prentsaurrekoan jakinarazi dutenez, 1.845 lagun parte hartu zuten standean egindako zozketetan, Erandioko Tahona Uribek 800 bat txorizo-mokadu eman zituen, 980 bisitarik parte hartu zuten sardina eta txakoli dastaketan, beste 1.225ek jan zuten marmitakoa, 640k euskal pastela eta, azkenik, 1.340 pertsonek gozatu zuten indaba-janaz.
Erandioko Udalak maiatzaren 9an sinatu zuen turismorako lankidetza hitzarmena Barakaldo, Santurtzi eta Trapagarango tokiko erakundeekin, Expovacaciones azokan parte hartzeko. Lau udalerri horiek 300 metro koadrotik gorako erakustoki berezian bat egiten zuten, Bizkaiko pabilioian, eta hainbat ekitaldi egin ziren bertan. Trabudu Dantzari Taldearen dantza erakustaldia, munduko txapeldunak diren Erandioko Goiherri sokatira taldearen ekitaldia, harri-zulatzaileen erakustaldia, Malaka eta Danetarako Danok taldeen dantzaldia, eta Danok Bat fanfarrearen musika, besteak beste. Izandako "arrakasta" ikusita, inguruko udalerriak deitu dituzte Minervion-en parte hartzera, "horien turismo eta ekonomia garapena sustatzeko asmoz".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun