Bolognako hitzarmenaren aplikazioaren kontrako lanuzteak izango dira bihar EHUn

Euskal Herriko Unibertsitateko Ikasleen Kontseiluak eta Ikasle Abertzaleak sindikatuak bi ordutako lanuzteak, 12:00etatik 14:00etara deitu dituzte biharko EHUko eskola eta fakultate guztietan. Protestaldi horren iturburua 1998an sinatutako Bolognako Prozesuan (pdf) dago. Izan ere, 2010ean indarrean sartuko bada ere, Europako Goi-Mailako Hezkuntza Esparrua (EGHE) dagoeneko ezartzen ari da EHUn Unibertsitate Irakaskuntzarako Kredituak Ezartzeko Plangintzaren bidez. Bihar, Bolognako hitzarmenaren aldeko, kontrako zein kontrako sutsuak diren ikasle taldeek bat egingo dute "gutxiengo irakurketa" baten inguruan: "EHUn hitzarmena gaizki aplikatuko" dutela eta gainera "ikasleen ahotsa entzun gabe eta kontuan hartu gabe" egingo dutela. Ikasleen Kontseiluaren arabera, "ikasleriak jakin gabe eta dekanoen, zuzendarien eta sailburu askoren oposizioarekin" martxan jartzen ari da plangintza. Horren aurrean, errektoretzaz gain, ikasleria eta irakasleriaren partaidetza bermatuko duen zentro bakoitzeko ikerketa batzorde bana zabaltzea eskatu du ikasleen erakundeak. Leioako campusean 12:00etan elkarretaratzea egingo dute Errektoretzaren aurrean.