Igeltsera gaztetxearen desalojoa salatu dute ehunka gaztek
2005ko mai. 28a, 17:40
“Igeltsera bizirik, gaztetxea lortuko dogu” lelopean 250 bat gazte batu ziren atzo arratsaldean Sopela eta Urdulizko Gazte Asanbladak asteazkenean egindako deialdiari erantzunez. Manifestazio kilometrikoa izan zen, eta Sopela-Urduliz-Sopela ibilbidean guztiz hormatuta dagoen Igeltsera gaztetxetik birritan pasatu egin zen. Bizkaiko Foru Aldundiak indarrez berreskuratutako eraikinean hogei bat ertzain egon zen zaintza lanetan oldartzeko tresneria eskuetan zuela. Halere, asteazkenean ez bezala atzo ez ziren gazteen kontra aritu. Urdulizko batzokiaren aurrean, petardo bat bota eta gero, irakurri zuten adierazpenean Kukutza, Itzubaltzeta, Algorta, Leioa eta beste herri eta gaztetxeen laguntza eskertu zuten SUGAkoek. Era berean, azken bi asteotan bizi izandakoa gogoratu zuten eta Bizkaiko Foru Aldundia, EAJ eta Sopela eta Urdulizko agintarien “jarrera” ertzainei leporatu zizkieten desalojoa, identifikazioak eta jipoiketekin berdindu zuten. Dena den, “negoziatzeko prest” agertu zen SUGA, baina “ez gaituztela kikilduko” argi utzi zuen.Gazteek EAJ, Ertzaintza, Ibarretxe, Bizkaiko Foru Aldundia eta Sopela eta Urdulizko alkateen kontrako leloak bota zituzten ibilbidean zehar, batez ere Sopela eta Urdulizko batzokien zein Igeltseraren aurrean. Bestalde, okupazioa, guztiontzako etxebizitza, Igeltsera eta kultura herrikoiaren alde oihukatu zuten. Hainbat gazte igeltseroz jantzita zihoazen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun