Maketa grabatzen hasi aurretik UKabilkada ikusteko aukera egongo da bihar Algortan
Bihar, ekainak 2, osteguna, Uribe Kostako UKabilkada musika taldeak joko du Algortako Traganarru tabernan arratsaldeko 20:30etik aurrera. Orain dela aste batzuk UKabilkadako kideak diru bila jarri ziren, CD-maketaren grabazioa autokudeatu ahal izateko. Helburua lortzeko, “Gu gara mendekua” leloko elastikoak saltzeari ekin zioten, eta Unai Gorozika bateria joleak UKBERRIri aitortu dionez “nahikotxu saldu dugu”. Alabaina, espero ez zuten eragina ere izan du buru-hezur txapeldunaren kamisetak: “ume mokordoak ere UKabilkadako kamiseta jantzita ikustea izugarria da”. Gauzak horrela, nahiz eta oraindik diru guztia ez bildu, uda baino lehen sartuko da UKabilkada grabazio estudioan eta CDa bukatzeko epemuga aldaezina jarri dio bere buruari taldeak. Izan ere, uztailaren 7an kideetako bat oporretan joango da eta maketa data hori baino lehen bukatuta egon beharko da. Argazkian (MusikaGida), UKabilkadako kideak kostaldean.
UKabilkada musika taldea 2003ko udaberrian sortu zen, baina, Estatu espainiarraren epaileek erabakitakoaren ondorioz, Martin taldekidea kartzelan sartu zutenez banda beste baxu baten bila ibili zen. Uribe Kostako taldeak Oi, punk eta horrelako estiloko kantak jotzen ditu, bere kideek esaten dutenagatik. Goro (bateria), Lasa (baxua), Iker (gitarra), Piña (ahotsa) eta Martin (baxua ere, kartzelan, “Estatu espainiarrak dispertsatua”) dira taldekideak eta Uribe Kostan zein Ezkerraldean ematen dute hainbat kontzertu. Hitzei dagokienez, euskaraz zein gaztelaniaz abesten dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun