Irune Padró Itxartu Gaztetxoen begiraleak UKBERRIri aitortu dionez, “dena prest dago” Bizkai osotik etorriko diren berrehun bat ume jasotzeko eta egun osoan zehar haiekin ondo pasatzeko. Horrela, eta nahiz eta eguraldiarekin guztiz ez fidatu, antolatzaileak “oso animatuta” daude. Izan ere, esperientzia handia daukate dagoeneko Itxartuko hamar begiraleek: soilik ikasturte honetan 35 bat umeren ardura daukate, haietatik 25 sei eta hamabi urte bitartekoak eta beste 10 hamabi eta hamabost bitartekoak.
Jarduera anitz Itxartun
Itxartuko kideek asteburuetako saioetan zein Gabonetako haur parkera edota Donostiako patinaje pistara egindako txangoetan “ederto” pasatzen dute. Horretaz gain, Itxartuko dantza taldearekin harreman zuzena daukatenez, Santa Agedan, Olentzaron eta Inauterietan abestera eta dantzatzera irtetzen dira taldekideak. Itxartu Gaztetxoen begirale denak eta ume gehienak euskaldunak dira eta euskaraz egiten dituzte jarduera guztiak, baina euskara behar beste menperatzen ez duen umerik ere badago taldean eta behar denean bat-bateko itzulpengintzaz arduratzen da begiraleren batek.
Itxartuz gain, beste hiru Gaztetxo talde daude Uribe Kostan: Leioako Amets Berria, Erandioko Kilkirtxu eta Urdulizko Ipurtats, iazko Gaztetxo Egunaren antolatzailea. Beraiekin batera Alonsotegi, Bilbo, Mungia, Basauri eta Gordexolako taldeek osatzen dute Bizkaiko Gaztexoen Koordinadora. Gaztetxo talde guztien helburu nagusia "ume bakoitzaren hezkuntza bultzatzea" da eta horretarako aisialdi ekitaldiak erabiltzen dituzte. Gaztetxoenek lau urte dituzte eta 16 urterekin bukatzen da gaztetxoa izateko garaia, norberak begirale gisa jarraitzea ez badu erabakitzen.
Eguneko egitaraua:
11:00etan, Bizkaiko Gaztetxoak taldeen kalejira, dantza taldea,
txistulariak, trikitixa, buruhandiak eta zanpantzarrak, Algortako
metrotik Biotz Alai plazara.
11:30ean, Gaztetxo Egunaren hasiera:
· Puzgarriak.
· Euskal dantzak Algortako Itxartu dantza taldearen eskutik.
· Karts.
· Arku-jaurtiketa.
· Tirolina
13:00etan, Ginkana.
14:00etan, Sari-banaketa eta omenaldiak.
14:30ean, Herri bazkaria talde partehartzaileentzat.
16:00etan, Disko-festa
19:00etan, Ekitaldien amaiera.
Gaztetxo Eguna ospatuko dute gaur, larunbata,urtero legez Bizkaiko Gaztetxoek. Pasa den urtean bezala, ume eta gazteen aisialdirako koordinadorak Uribe Kosta aukeratu du jolasean aritzeko. Iaz Urdulizen izan zen eta aurten, Algortako Itxartu Gaztetxoek 25 urte bete dituztela ospatzeko, Biotz Alai eta San Nikolas Algortako bi plaza hartuko ditu Gaztetxoen festa nagusiak. Algortako Itxartu Gaztetxoek eta Bizkaiko Gaztetxoen Koordinadorak antolatutako egitaraua goizeko 11etan hasiko da metro geltokitik irtengo den kalejirarekin eta hortik aurrera dantzak, trikitixa, jolasak, buruhandiak, kart, herri bazkaria, disko festa, eta denetarik izango da ondo pasatzeko. Argazkian, Itxartu Gaztetxoen kide batzuk San Nikolasen, aurtengo Gaztetxo Eguneko kartelarekin.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun