Goizeko 13:00etan deituta bazegoen ere, 13:45ak arte ez da hasi M.G.M.-ren deklarazioa. Konfiantzako abokatuaz lagunduta, eta kanpoan 30 lagun kontzentrazioan sostegantzen zutela, gaztea hiru ordu laurden aritu da epailearen galderak erantzuten. UKBERRI.NETek jakin duenez, argazkiz ondo hornitutako sumarioko kontuen artean sei izan dira epaileak gaur miatutako gaiak: gazteak Mecanica de la Peñara nondik sartu ziren; kanpoko hesiak nork apurtu zituen; Ertzaintzako Brigada Higikorreko kide batek salatutako lesioak nork eragin zituen; Igeltzera industrialdeko tailer baten kristala zelan apurtu zen; zer motako jarduerak egiten ziren gaztetxean; eta, azkenik, nor zen gaztetxeko “arduraduna”.
Igeltserako "arduraduna"
Gaur deklaratu duen inputatuak Justizia jauregiko kanpoaldean esandakoaren arabera, epailearen aurrean kalte materialik edo fisikorik eragin izana ezeztatu du eta bai atea bai hesia “irekita” zeudela deklaratu du. Horrela, gogoratu du bertako langile batek atea giltzapean jartzea “ez zuela merezi” esan ziela gaizkileek “giltzarrapoak maiz apurtzen zituztelako”. Bestalde, tailerraren kristala Ertzaintzak apurtu zuela esan du, eta “beltzek” hainbat jende jipoitu zutela baina inork ez ziela erantzun, ezintasunez. M.G.M.-k aipatu du bera kolpatu zutela beste lagun bati ez jipoitzeko eskatzeagatik. Bestalde, eraikinaren barruan egindakoari buruz, gazteak azaldu du Tai Txi eta zur-lanketa tailerretan parte hartzen zuela. Azkenik, M.G.M.-k ukatu du “arduraduna” izatea eta gogoratu du gaztetxeen funtzionamendua asanblearioa dela eta Igeltseran ehunka gaztek parte hartzen zuela.
Gaiaren inguruko berriak:
Euskal Bizikletan protestaldia burutu du Sopela eta Urdulizko Gazte Asanbladak (2005 Eka 01)
Igeltsera gaztetxean egindako lana Sopelan kaleratu du SUGAk (2005 Mai 28)
Arartekoak Igeltsera gaztetxearen auzia ikertuko du (2005 Mai 28)
Igeltsera gaztetxean identifikatutako hiru gazteren kontra jarritako salaketaren haritik gaur eguerdian Getxoko 4. epaitegian deklaratu du M.G.M. gazteak. Bizkaiko Foru Aldundiak apirilaren 20an aurkeztu zuen salaketa Urdulizko Mecanica de la Peña lantegi zaharrean usurpazioko ustezko delitua egin zelakoan. Ertzaintzak bost egun ezberdinetan 70 pertsona baino gehiago identifikatu bazituen ere, epaileak hiru kide baino ez ditu deitu deklaratzera, maiatzaren 17an Igeltsera 24 ordutan husteko agindua jaso zutenak, alegia. Epaileak egindako galderengatik, baliteke gazteei bestelako delituak ere inputatu nahi izatea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun