Otsaileko Udal Batzarrean zarama tasaren %86ko igoera lotsagarria onartu zuen Getxoko Udalak. Igoera indarrean da, baina zabortegia itxi eta hondakinak Getxotik Zabalgarbiren errauskailura eramateko esleipena onartu arte ez digute oraindik kobratuko. Zarama tasaren igoera honez gain, indarrean dira azaroan onartu zituzten beste tasa igoerak, hala nola estolderia tasa edo Fadura eta kirol instalazioak erabiltzeko ordaindu behar ditugunak.
Getxo Biziako kideok oso kezkatuta gaude, tasa igoeren politika honek zerbitzu publikoen izaera soziala zeharo desegiten duelako, jende askoren bazterketa eragiten duelako eta oro har hiriguneetan kokatuta dauden denda eta aktibitate komertzial txikiak kaltetzen dituelako.
Honengatik guztiagatik zarama tasaren %86ko igoera gure fakturetan ikusi aurretik eta hurrengo igoeren berri izan arte itxaron gabe, udal tasen jeitsieraren aldeko ekimenak abian jarri behar direla uste dugu.
Getxo Bizia herri plataformak udal tasen jeitsieraren aldeko asanblada irekiak deitu ditu Algortan eta Itzubaltzeta / Erromon, honen guztiaren inguruko hausnarketa eta ondorengo ekimenak herritarrekin batera egiteko. Asanblada hauetara deitzeko eta parte hartze herritarra bultzatzeko udal tasa eta zergen azken igoeren aurrean alegazioak aurkeztu zituzten herritarrei gonbidapen gutunak bidali eta dendaz denda ari gara asanblada hauen berri ematen. Algortakoa ekainaren 15ean, asteazkena, izango da Villamonte kultur etxean arratsaldeko zortzietan. Itzubaltzetakoa, berriz, aste bete beranduago izango da, ekainaren 22an, Erromoko kultur etxean arratsaldeko zazpi t'erdietan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun