Abigail Laskozek (Bilbo, 1972), Amaia Lekerikabeaskoak (Bilbo, 1973) eta Lide Zaltzadak (Gernika, 1977) irabazi dute Bizkaiko Foru Aldundiak antolatutako 2005eko Ertibil saria. Hirurek EHUko Arte Ederren Fakultatean ikasi zuten. Lan sarituak eta beste 17 lagunenenak Barakaldoko Gurutzekotako udal aretoan egongo dira ikusgai hilaren 26ra arte, eta ondoren Bizkaiko hainbat herritara eramango dute: Bilbo, Zornotza, Basauri, Gernika, Ermua eta Bermeora, besteak beste. Baita Uribe Kostako Gorliz herrian ere. Aurtengo edizioan 114 artistek hartu dute parte. Beste alde batetik, Bilboko artearen eta Londresekoaren arteko ezberdintasunak aztertu dituzten EHUko hainbat ikasleren lanak egongo dira ikusgai, bihartik aurrera, Leioako campuseko Liburutegi Nagusiko Erakustaretoan. Uztailaren 6ra arte egongo da ikusgai "Arte en la Distancia" (Artea distantzian) izenburuko erakusketa, unibertsitateko iturriek jakinarazi dutenez.
Hamar artista gazteen lanak ikusi daitezke aipatu erakusketan, EHUko Arte Ederren Fakultateko ikasleak guztiak. Lau aste egin dituzte Londresen hiri horretako metodo artistikoak aztertzen. "Hiri batean edo bestean bizitzeak bakoitzaren artelanetan zer nolako eragina duen nabarmentzeko aukera ematen diote ikusleari lanek", EHUko iturriek adierazi dutenez. Londresen egondako denboran, Bilboko artearen eta Londresekoaren arteko ezberdintasunak aztertu zituzten ikasleek: eskala, espazioa edota gizarte zein kultur esparruei dagokienez. Horretaz gain, hiri bien arteko antzekotasunak nabarmendu dituzte; "Guggenheim eta Tate markak adierazle diren globalizazio artistikoaren aldeko mugimenduarekin bat datozelako biak".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun