Auzitegiko laugarren epaitegiaren aurrean aurkeztu zituen fiskalak bere ondorioak asteartean (ekainak 14). Eta hain zuzen ere, egun berean, epaitegi berberak aske utzi zituen Amnistiaren Aldeko Batzordeetako lau kide (Julen Zelarain, Asier Vilumbrales, Joseba Iñaki Reta eta Josu Mirena Beaumont) behin behineko kartzelaratzearen gehienezko epea bete egin dutelako. Gainera, AAB legez kanpo utzi eta desegitea eskatuko du.
Uribe Kostako Amnistiaren Aldeko Mugimenduak adierazi duenez, "honi 'Amnistiaren Aldeko Batzordeak / Askatasuna' auzia deitu badiote ere, Amnistiaren Aldeko Mugimendu osoaren kontrako auzia dela esan behar dugu, eta, azken batean, Euskal Herria izatearen kontrakoa. Epaitu nahi gaituzte, baina hemen epaian dagoena espainiar estatuko zapalketa sistema osoa da!".
Espainiako Auzitegi Nazionaleko fiskalak 10 urteko kartzela zigorra eskatu du Amnistiaren Aldeko Batzordeetako 27 arduradunentzat, ETAren barruan aritzen zirela egotzita. Inputatuen artean eskualdeko Jagoba Terrones berangoztarra (argazkian) eta Mitxel Sarasketa algortarra daude. Berango aldekoa beste zigor bat betetzen ari da, eta 2006ko maiatzean amaituko du hori. Hain zuzen ere, auzi horretako fiskalaren eskaera agiria (gaztelaniaz baino ez dago) jarri du irakurgai Uribe Kostako Amnistiaren Aldeko Mugimenduak Etengabe bitakoran.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun