Jose Ramon Zubizarreta Arenas Futbol Taldeko presidenteak egindako adierazpenetan argi utzi du hitzarmena aldatzearen arrazoiak ez direla "ekonomikoak" izan, "kirol mailakoak baizik". Athleticek zein Realak urteko 24.000 euro inguru eskaintzen zuten baina Arenas oso kritiko agertu zen Athleticekin izandako hitzarmenarekin, Bilboko futbol taldeak jokalari oso gazteak eramaten zituelako, tartean "haurrak, kimuak...". Bestalde, Realak orain arte ez du jokalaririk eskatu.
Akordioa lau denboraldietarako da, baina Arenasek nahi duenean bertan behera uzteko aukera izango du. Athleticek erabakia jakin bezain laster, Arenaseko arduradunei batzarra egitea eskatu die, eta EITBk jakinarazi duenez, baliteke bi aste barru batzartzea.
Uribe Kostako futbol talde historikoa Realarekin lotu zen pasa den urritik hilabete horretan sinatutako hitzarmenaren bidez, Athletic-ekin zeukan akordioari bukaera eman ostean. Albisteak harridura sortu du Bizkaiko futbolean eta baita ere Arenaseko hainbat bazkideren artean, orain arte 1909an sortutako taldea beti Athleticekin lotuta egon baita. Hitzarmena urrian egin zen, baina orain arte ez da jakinarazi akordioa zegoenik. Realarekin izandako hitzarmena ezkutuan egon da, jokalariak eta bazkideak ez baitzeuden jakinaren gainean. Argazkian, Arenaseko talde nagusia, Ligako 3. mailan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun