Aurreko urtetan Euskal Herriko beste hainbat herrietan ospatu da Euskal Selekzioaren Eguna: Agurain (2004), Senpere (2003), Arbizu (2002), Tolosa (2001), Bilbo (2000) eta Oiartzunen (1999), hurrenez hurren. Urteotan, euskal politika, gizarte eta kirol munduetako pertsona ugari agertu dira ekimenaren alde.
Euskal selekzio nazionalen aldeko manifestua
Athleticeko Aitziber Juaristi "Tzibi" eta Iker Acero surflariak honako dokumentu hau irakurri zuten ekainaren 24an Bilbon ESAITek antolaturiko Euskal Selekzioen Eguna aldarrikatu eta beren atxikimendua iragartzerakoan. Euskal selekzioa bultzatzearen inguruan duen interesa dela-eta, beronen edukia hitzez hitz transkribaturik aurkezten da.
1. Gaur egun, Euskal Herriari ez zaio aitortzen Selekzio propioa izateko duen eskubide kolektiboa.
Ondorioz, euskal kirolariok nazioarteko txapelketa ofizialetan ezin dugu parte hartu euskal selekzioarekin eta, gainera, diziplina federatiboa dela eta, derrigortuta gaude txapelketetan parte hartzekotan, gure herriak bereak sentitzen ez dituen koloreekin egitera, hots, Espainia eta Frantzia ordezkatzera.
2. Euskal kirolariak garenez, euskal nazioaren koloreekin eta gure ereserkiaren doinuen pean lehiatu nahi dugula aitortzen dugu.
Beraz, Euskal Selekzioak nazioartean eta txapelketa ofizialetan parte hartu ahal izateko duen eskubide kolektiboa oinarritzat hartuta, Euskal Selekzioaren ofizialtasuna aldarrikatzen dugu.
3. Euskal selekzioa nahi dugu eta horretarako, euskaldunok Euskal Herriko Federazio Nazionalak behar ditugu.
4. Beraz, guztion laguntza beharrezkoa da. Horregatik, gure aldetik saiatuko gara bidea jorratzen, ea guztion artean, egun ametsa baino ez dena, ahalik eta azkarrena, errealitate bihur dadin lortzen dugun.
Gora Euskal Herriko Selekzioa!! Gora Euskal Herriko Federazio Nazionalak!!
Iganderako egitaraua:
10:00 Kalejira. Algortako Telletxe plazarik Portu Zaharreraino (Txistulariak, gaiteroak, dantzariak, trikitilariak....)
10:30 Ikurrinaren igoera eta gunearen irekiera
11:00 Esaitbiton (Aerobic)
11:00 Haurrentzako puzgarriak eta eskalada murrua
11:30 Euskal Selekzioaren aldeko ekitaldia
12:15 Pirritx eta Porrotx pailazoak
13:15 Bertsolariak (Andoni Egaña, Sustrai Kolina, Xabi Paya
14:00 Nasapuntako (kukaña)
14:30 Herri bazkaria. 400 pertsonentzako paella. Bazkariaren tiketak erosteko: Kantza Kirol Modan eta Ciclos Getxon
15:30 Euskal kantak
16:00 Estropadak
16:00 Txatunga Benbe
17:30 Herri kirolak
18:00 Arku-jaurtiketa eraskutaldia
19:00 Sardina-jana
19:00 Kontzertua: Zea Mays
20:30 Erromería: Amaiur
22:00 Jaiaren amaiera suzko zezenarekin
Egun guztietan zehar piraguak, fanfarreak, trikitilariak eta txalaparta ikastaroa UKTEST taldearen eskutik.
Uztailaren 3rako Euskal Selekzioaren Eguna antolatu du, Algortako Portu Zaharrean, Euskal Selekzioen Aldeko Iritzi Taldeak (ESAIT), zazpigarrena dagoeneko. "Euskal Herriko Federazio Nazionalak sortu, kirolariok ere bai" lelopean, euskal selekzioen ofizialtasuna aldarrikatzea izango du helburu jaiak. Txikienetatik hasita zaharrenetaraino, jarduerez beteriko jai giroa gozatu ahal izango dute igandean, 10:00etatik aurrera, bertara hurbiltzen direnek. Argazkian, Amaiur Alfaro (belaontzia), Iñaki Perurena (harrijasotzailea), Mikel Goñi II (pilotaria), Aitziber Juaristi "Tzibi"(Athletic-eko futbolaria) eta Iñigo Landaluzek (txirrindularia), getxoztarrak azken biak, aurtengo Euskal Selekzioaren Eguna ezagutzera emateko telebista eta irratientzat spota grabatu zuten egunean, Algortako Portu Zaharrean bertan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun