Uribe Kostako Amnistiaren Aldeko Mugimenduak Etengabe bitakoraren bidez jakinarazi duenez, uztailaren 4tik isolaturik dago Endika Lejarzegi algortarra, eta hilaren 15era arte luzatuko da zigorra. "Lau liburu, irratia eta idazteko materiala eraman ditu bertara, eta bi orduz ateratzen dute patiora goizetan. Deiak eta bisitak orain arte bezala egingo dituela suposatzen da, bere familiarrei telefonoz adierazi dienez", azaldu du errepresioaren aurkako kolektiboak. Lejarzegiren auzokide Aimar Hidalgok ere isolamenduan dago egun beretzuetan, bost egunez, "epaileari errekurritu eta zigorra egun kopuruetan arindu baitzion".
Bestalde, bisitetan arazoak izan dituzte berriro ere Lejarzegiren senitartekoek. Uribe Kostako Amnistiaren Aldeko Mugimenduak azaldutakoaren arabera, "aurreko larunbatean, uztailaren 2an, arazoak izan zituzten bis familiarra egiteko. Duela 2 urtetik hona 4 pertsona gehi Endikaren iloba (gaur egun, 2 urte eta 4 hilabete dituena) sartu izan dira. Behin baino gehiagotan galdetu izan dute haurren kasuaren inguruan eta erantzunen arabera, 'los bebes, los que se llevan en brazos, no cuentan'. Arau eta azalpen hain 'zehatzen' aurrean, iloba eta beste 4 pertsona sartzen egon dira hilero-hilero. Azken larunbatean, ordea, ez zieten pasatzen utzi. Badirudi, aurreko hiletik hona gizontxoa bihurtu zaielako iloba. Horren ondorioz, Endikaren amamak kanpoan geratu behar izan zuen sartu gabe".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun