Kontzertu nagusiei dagokienez, aurten Boban Markovic Orkestra taldeak hasiko du Getxo Folk. Talde hau Balkanetako ijito-orkestrarik ospetsuenetako bat da. Bere eskutik, jendeak jai giroko musika entzungo du, dantzatzeko eta mugitzeko asmatua, baina bestelako alderdiak ere badituena (esaterako, malenkonia). Boban Markovicen jakituria instrumentalari esker, serbiar brass bandak beste dimentsio batera iritsi dira. Talde honen legenda laurogeita hamarreko hamarkadaren hasieran abiatu zen. Hamarkada hartan, urtero-urtero irabazten zuten Gucarit-eko Dragacevo Jaialdi ezaguna, ijito-musikako metalen taldeetako jaialdi nagusia, Balkanetako talderik onenak biltzen dituena. Haien musika mundu osoan ezaguna da orain, eta zinera ere eraman dute Emir Kusturica zuzendari ospetsuaren eskutik.
Irailaren 2an, Sharon Shannon, irlandar folkeko artistarik ezagunenetako bat eskainiko du emanaldia. Urte gutxitan bere herriko musika tradizionaleko ezinbesteko erreferentzia bihurtu da. Clare konderriko Ruan herrikoa da Shannon; eremu profesionalean 1990ean agertu zen estreinako aldiz, Jim Sheridan ospetsuari esker, "The Hostage" musika egitasmoan txoko bat eskaini zionean, Galwayko Druide antzoki ezagunean antzeztua. Urte hartatik aurrera, Sharonen karrera arrakastaz josita egon da, eta zazpi disko grabatu ditu.
Jaialdiaren erdialdean Malkit Singh jardungo da Areetan. "Bhangraren erregeak" mundu osoan zabaltzen ari den musika mota bat plazaratuko du Areetan, Punjabeko doinu tradizionalak erritmo elektronikoekin eta poparekin nahastuz.Malkit Singh 1963an jaio zen Hussainpur-en (Punjab, India), eta Punjabeko tradizio folklorikoko maisurik ohoragarrienekin ikasi zuen. Bere herrian "Golden Voice" sari garrantzitsua irabazi zuenean, ez zuen susmorik ere bere talentuari eta indarrari esker bhangra ohiturarik zaharrenetatik Indiako zinearen pantailetara (Bollywood deritzon industria indartsura) eta hortik mendebaldeko kultur eta abangoardia giroetara eramango zuenik. "Nach Gidde Wich" disko harrigarria izan zuen aurrenekoa, eta 1987an bhangra musikako industria jaio berriko arrakastarik handiena jaso zuen, "Gurh Nalon Ish Mitha" lanaren bitartez. Laster, Singh-i bhangraren errege deitzen hasi ziren. 1988an, "Upfront" diskoarekin, anglo-asiar zirkuitua gainditu zuen eta bhangraren historian gehien saldutako diskoa bihurtu zen. Harrezkero hogei lan atera ditu eta pelikula eta dokumentaletako musika idatzi du, esaterako, Mira Naïren "Montzoiko ezkontza" eta Gurinder Chadharen "Beckhamen modukoa izan nahi dut".
Azkenik, kontzertu nagusietako azkena emanaldi bikoitza izango da. Lehenik eta behin, Korrontzi taldeko kideak aterako dira oholtzara. Proiektu honen bidez bizkaitar trikitilari ezagunen lana omendu nahi dute. Gero Olodumkultur kolektiboak joko du. Talde hau 1979an sortu zuten Salvador de Bahíako Maciel-Pelourinho barrutiko bizilagunek (Brasilen), Inauterian talde antolatu edo "bloco" gisa parte hartzeko eskubidea aldarrikatzeko. Olodum taldean, hamasei urtean, 800 lagun izatetik 3.000raino iritsi dira Inauterietako desfilean. Eurek esaten dutenez, "Kultura beltzaren balioak gorde gura dituen taldea da Olodum. Haientzat, arrazismoaren aurkako borroka funtsezkoa da. Talde honen barnetik musika talde bat sortu zen, nazioartean garrantzi handia hartu duena, "The Rhythm of the Saints" bezalako lanei esker eta Paul Simonen neurriko artistekin lan egiteagatik.
Bestelako kontzertuak
Arratsaldeko kontzertuei (19:30) dagokienez, Areetako Telletxe plaza ondoan dagoen aparkalekuan izango dira, ohi bezala. Bertan nazioartean hain ezagunak ez diren baina kalitatea erruz duten taldeak jardungo dira. Gauez, leku berean Munduko Terrazan (23:15), jendeak hurbilagoko erritmoak gozatu ahal izango ditu, Injuve Musikaren Zirkuituen atalean parte hartzen duten talde gazteen eskutik.
Gainera, beste herri batzuetako kale-bandek desfileak egingo dituzte. Horrela, herriko kaleak erritmo tradizionalen erakusleiho ikusgarria izango dira. Aurtengoan, Eskoziako eta Alemaniako taldeak egongo dira. Azkenik, jaialdian Bidezko Merkataritza Azokaren edizio berria egongo da (irailaren 1ean), zenbait GKErekin lankidetzan. Munduko Merkatua, berriz, abuztuaren 30etik irailaren 4ra arte izango da.
Boban Markovic, Sharon Shannon, Malkit Singh eta Olodum artistek joko dute aurtengo Getxo Folk Jaialdian
Dagoeneko hogeita batgarren edizioko egitaraua prest daukate Getxoko Nazioarteko Folk Jaialdiko antolatzaileek. Besteak beste, artista eta talde hauek aipatu behar dira: Boban Markovic (argazkian), Sharon Shannon, Malkit Singh eta Olodum. Horiez gain, beste zortzi talde egongo dira, munduko musika Areetara ekarriko dituztenak, irailaren 1etik 4ra bitartean. Korrontzi taldea izango da euskal musikaren ordezkari eszenatoki nagusian. Urtero bezala, eguna hasteko, arratsaldeko kontzertuetako talde eta artisten emanaldia izango da, Xake plaza ondoko aparkalekuan, 19:00etatik aurrera. Kontzertu nagusiak 21:30etan hasiko dira plazako karpan; amaitzen direnean, 23:15ak inguru, Munduko Terrazan (Telletxe plaza ondoko aparkalekuan ere bai) gaueko kontzertuak egingo dira. Gainera, hilaren 4an umeentzako ikuskizuna egingo da, eguerdiko hamabietan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun