Defentsaren abokatuaren esanetan, "Bernabeura jokatzera doan euskal futbol talde baten modukoak gara gu, baina Real Madrideko sozio den epailea izango duen partida batean".
Sumario honetan auzipetua dagoen Jose Luis Elkorok gaineratu duenez, "neurriz kanpokoak dira Fiskaltzak egindako zigor eskaerak, gehientsuenak Administrazio Kontseiluko kide izateagatik baikaude auzipetuak. 'Terrorismoa'ren aitzakian zigor eskaera neurrigabeak egin dituzte".
Hala ere, "epaiketa honetan 'Egin' eta Egin Irratiak ez dutela ETArekin inolako harremanik frogatuko dugu, izan ere, ez baitago inolako frogarik hori agerian uzteko", esan du Elkorok.
Teresa Toda auzipetuak azpimarratu nahi izan duenez, halaber, Poliziak epailearen aginduz bi hedabide hauek itxi zituenean gertaera hori "txalotu zutenetako asko eta asko denborak aurrera egin ahala ohartu dira zein larria izan zen hura".
Auzipetuen artean Jexux Mari Zalakain Leioako campuseko Gizarte eta Komunikazio Zientzien Fakultateko irakasle kaleratua dago.
Gaur bete dira zazpi urte "Egin" eta Egin Irratia Garzon epailearen aginduz itxi zituztenetik. Auzipetuek, defentsaren abokatuak eta euskal PEN klubeko kideek prentsaurrekoa eskaini dute gaur goizean. Alvaro Reizabal abokatua, Jose Luis Elkoro eta Teresa Toda auzipetuak baita Laura Mintegi euskal PEN klubeko kideak ere eskaini dute prentsaurrekoa, "Egin" egunkaria eta Egin Irratia itxi zituztenetik zazpi urte igaro direnean. Reizabalek adierazi duenez, Espainiako Auzitegi Nazionalak datorren urriaren erdialdean hasi nahi luke epaiketa baina, sumarioak dituen agiri kopuru handia kontuan izanda, litekeena da gutxienez 2006ko urtarrila arte atzeratzea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun