01:30ean iritsi da Aimar Algortara

Ehun bat pertsonak egin dio lehen harrera Aimarri, 01:30ean. Leioako gasolindegitik auto karabanan etorri da, Algortako kaleetatik buelta zaratatsua egin eta lehenengo besarkaden ostean, lore sorta eta aurreskua eskaini diote gazteek ongi etorria adierazteko. Aimarrek hitza hartu du bertaratutako guztiei eskerrak emateko. Irteteko eguna pozgarria eta aldi berean tristea ere izan dela aitortu du, barruan lagun on asko gelditu direlako. Bestela ere, azken aldian euskal preso politikoen kontrako jazarpena areagotu egin dela salatu du. Eusko Gudariak kantatu eta brindisak egin ostean, bere argazkia kendu du tabernako hormatik. Omenaldi politikoa uztailaren 29an egingo zaio.