Argazkiak kalean egiteko makinaren itxura du “racismomaton” deritzonak. Makina hau amaitu berri den Getxoko Folk Jaialdian ere martxan izan da. Udalak emandako informazioaren arabera, "racismomaton" ez da esperimentu soziologikoa, galdeketa makina barruan egiten baita eta emaitzak ez direlako inolako azterlanik egiteko erabiliko. Izan ere, testa egin ostean, behin betiko ezabatuko da. Makinaren helburua “gaiarekiko bakoitzaren hausnarketa" bultzatzea baino ez da, Iñaki Urkiza, Gizarte Zerbitzuen zinegotziak esan duenez.
Arrazista ala ez, hamar minututan
Ameriketako Estatu Batuetako Washington eta Princetongo unibertsitateen psikologoek sortutako IAT testa hartzen du oinarri gisa. Honakoak neurtzen ditu: inkontzienteki ditugun joera esanguratsuak, estereotipo eta aurreiritzien adierazleak, portaera arrazisten oinarrian dauden elementuak. Oso erraz erabil daiteke; ordenagailuak galdera oso errazak egingo ditu eta norberak botoi birekin erantzun behar du; izan ere galdera horiek, hasieran behintzat, ez du ematen arrazakeriarekin lotuta daudenik. Testa bost minututan egin daiteke eta emaitza berehala aterako da pantailan.
Racismomaton Areetako Geltoki Plazan Immigrazio Arloak jarri duen karpan egongo da irailaren 8tik 10era egingo den Habaneren Jaialdian zehar. Gero, irailaren 12tik aurrera Villamonte kaleko Kultur Etxean jarriko da, irailaren 19tik 25era kulturen arteko trukea deritzon astearen barruan.
Gaiaren inguruko berriak:
Arrazakeria neurtzeko (Berria / 2004 abe 14)
Getxoko Udalak Areetako Xake plazan norberaren arrazismoa neurtzeko makina jarri du. Racismomaton izeneko bideo-joku moduko kabina Donostiako Artelekurekin lotutako Okupgraf taldeko Marian Larzabal eta Iñigo Royok diseinatu zuten iaz, eta Javier Madrazo EAEko Etxebizitza eta Gizarte Gaien sailburua eta Boladji Omer Bertin Oke Inmigrazioko zuzendaria arduratu dira EAEtik zabaltzeko, foru aldundien on ikusiarekin. Atzo, Iñaki Zarraoa Getxoko alkatea eta udal bereko Iñaki Urkiza Gizarte Zerbitzuen zinegotziak inaugurazio ofiziala egin zuten Areetako Xake plazan. Ekimenaren helburua alkatearen esanetan: “gure artean, ezkutaturik dauden jarrera arrazistei eta estereotipoei buruzko kontzientzia maila piztea auzokideen artean”.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun