Atzoko jardunaldia beltza izan zen euskal txirrindularientzat, baina Laisekak arantza hori atera die euskal zale guztiei goi-mendiko etapa horretan garaipena eskuratuta.
Azken igoeran Libertyko ziklistek erritmo bizia jarri dute jendea atzean uzteko, eta horren ondorioz, lasterketaburuan faborito nagusiak eta Laiseka besterik ez dira geratu. Algortarrak hainbat eraso jo ditu, baina hiru kilometro faltan jo duena izan da erabakigarriena. Tartetxo bat ireki du faboritoen taldetxoarekin, eta helmugara lehen postuan iristea zaila zuen arren, atzekoen zalantzak ondo aprobetxatu ditu Cerlerreko etapa irabazteko.
Ustekabeko poza hartu dute gaur Aragoiko Piriniotara joandako euskal zaleek. Roberto Laiseka Euskaltel-Euskadiko txirrindulari nagusienak –36 urte ditu– ihes eginda irabazi du Espainiako Vueltako hamaikagarren etapa, faborito guztien aurretik. Gaurko etapa Andorra eta Aramon-Cerlerko eski estazio artekoa izan da, eta 192 kilometrotako ibilbidea egiteko 5 ordu, 9 minutu eta 38 segundu behar izan ditu algortarrak. Laisekak 15 segunduko aldea atera die atzetik zihozen Carlos Sastre (CSC), Roberto Heras (Liberty Seguros), Francisco Mancebo (Illes Balears), Carlos Garcia Quesada (Comunitat Valenciana) eta Denis Menchov errusiarrari (Rabobank), azken honek sailkapen nagusiko lehen postuan sendo jarraitzen duelarik.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun