Pititakok zabaldutako Dorretxea gaztetxearen komunikatua, hitzez hitz:
Ohar honen bitartez zera jakinarazi nahi dizuegu: bart, goizaldeko 03:00ak aldera, Ertzaintzaren bi patruila gaztetxeraino bertaratu, han zeuden 6 gazteak identifikatu, miatu eta, ohikoa duten harrokeriaz, gaztetxeko giltza
lapurtu diete. Behin giltza berena zutelarik, ertzainak ongi armaturik, gaua igarotzen gelditu dira eraikin barruan. Gaur goizerako langile andana zen gaztetxean, betiere ertzainen zaintzapean.
Hau da Barakaldoko gazteok era autogestionatuan kudeatzen dugun lokala lapurtzen diguten bigarren aldia aste baten buruan. Guri dagokigunez, gurea dena defendatzen jarraituko dugu espekulatzaile eta txakur harroputz ororen gainetik. Aste honetarako pentsatuta geneuzkan aktibitate guztiak Bagatzako
plazan burutuko ditugu, eta larunbat honetarako iragarrita zegoen kontzertua, aldiz, Zorrotzako gaztetxean.
Hemendik bi deialdi luzatu nahi genituzke:
- Gaur, asteazkena, 20:00etan manifestazioa Bagatza plazatik
- Ostirala 9, 20:00etan manifestazioa Bide Onera plazatik
Dorretxea gure etxea! Ez gaituzue geldituko!
Barakaldoko Dorretxea Gaztetxea
Bart izandako bigarren desalojoa salatzeko manifestazioa deitu dute Barakaldoko gazteek
Atzo goizean komunikabideen aurrean gaztxearen lehenengo hustuketa eta, bereziki, ertzainek erabilitako bortxakeria salatu eta Dorretxean lan egiteko prest daudela esan zuten Barakaldoko gaztetxeko kideek. Era berean, Udalarekin akordioak hitzartzeko asmoa dutela azpimarratu eta larunbaterako kontzertua iragarri zuten gazteek. Bart, goizeko 3:00etan, aldiz, Ertzaintza bigarren aldiz aste batean hustu du Beurko Zaharrean dagoen Barakaldoko gaztetxea. Gazteek jakinarazi dute lokala defendatuko dutela eta gaur 20:00etarako deitu dute manifestazioa Bagatza plazan. Argazkian, atzo Barakaldoko Dorretxea gaztetxeko kideek eskainitako prentsaurrekoa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun