Aukera Guztien ilegalizazioarekin lotuta, inputatu gisa deklaratu beharko du astelehenean Eli Zubiaga algortarrak
Fernando Grande-Marlaska Espainiako Auzitegi Nazionaleko epaileak, irailaren 12an deklaratzera deitu du, bere garaian, Euskal Herritarrok taldeko eta ondoren Batasunako Bizkaiko euskara arduradun izandako Eli Zubiaga algortarra. ETAko kide izatea leporatzen dio. Iturri judizialak aipatuz hainbat berri agentziek zabaldu dutenez, Zubiagak Algortakoa ere den Gorka Garzia Sertutxa "Patas" presoari Huelvako espetxean egindako bisitan izandako elkarrizketa erabili dute inputatzeko. Epailearen autoan ageri denez, hauteskundeetarako "zerrenda zuriak" prest zirela esan zion Garziari Zubiagak. Hain zuzen ere, Aukera Guztiak hautesle elkartea baliogabetzeko argudiotzat erabili zituen epaileak, bi algortarrei eginiko grabaketak eta telefono entzuketak.
Eli Zubiaga astelehenean aurkeztu beharko da 5. Instrukzio Epaitegi Nagusian; Rafa Diez LABeko idazkari nagusia deklaratzera deituta dagoen egun berean, alegia. Honi ere ETAko kide izatea leporatzen dio Grande-Marlaskak. Izan ere, Diezi egindako entzuketak izan ziren Aukera Guztiak ilegalizatzeko beste argudioetako bat. Zubiaga eta Garziari egindakoei dagokienez, elkarrizketa baimenik gabe grabatua izan zela argudiatu zuen defentsak, Uribe Kostako Amnistiaren Aldeko Mugimenduak Etengabe.org webgunean jakinarazi duenez. "Epaileak, ordea, espetxeko zuzendariaren baimenarekin grabatu zela esan zuen", adierazi dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun