Del Bado Ogasun Arloan sartu zen pasa den irailaren 15ean, behin behineko funtzionario gisa, Iñaki Zarraoa alkateak sinatutako dekretua dela medio. Arrueren arabera, gaur egun Del Badok aritzen den arloa "udalaren garrantzitsuena da" eta bertan udalerriko auzokide zein enpresen datu ekonomikoak eskura izango ditu langileak. Horregatik, Arruek bere "kezka eta alarma" agertu du.
Ez da lehenengo aldia Arruek Del Bado kaleratzea eskatu duena, izan ere, hilabete honetako 14an PPk orduan Langileria, Antolaketa eta Informatika Arloko teknikaria zena kontratatu izana gaitzetsi zuen eta bere lanpostutik kentzea eskatu zion alkateari, Zarraoaren ezetza jasoz.
18/98 sumarioan auziperatua
Sabin del Bado prozesatuen eskubideak urratzeagatik nazioarteko jurista askoren kezka piztu duen 18/98 makrosumarioan auziperatuta dago. Bruselako HBko egoitzaren arduraduna, EAEko legebiltzarkide, eta Bizkaiko batzarkide izandakoa 2000ko otsailaren 1ean atxilotu zuen Espainiako Polizia Nazionalak Baltasar Garzon epailearen aginduz, Xaki elkarteko diruzaina izateagatik. Urte bereko uztailaren 12an aske gelditu zen, 30.000 euroko fidantza ordaindu eta gero. Geroago, 2001eko otsailaren 8an, argi gelditu zen ez zegoela arrazoirik kartzelan emandako sei hilabeteentzako, epaileak beraren kontrako zantzurik ikusi ez eta Xaki auzitik aske utzi behar izan zuenean.
2002ko abenduaren 19an, berriz, Espainiako Auzitegi Nazionalera deitu zuten Batasunako finantziazioa eta herriko tabernen auzian deklaratzeko. Aske gelditu zen 12.000 euroko fidantzapean. Hiru urte beranduago, 2005eko urtarrilaren 25ean, auzipetze agiria eman zioten. 2005eko irailaren 14tik aurrera Alderdi Popularrak bere lanpostutik botatzea eskatu du behin eta berriro.
PPk Getxoko Udaletik langile bat bota nahi du 18/98 sumarioan auziperatuta egoteagatik
Marisa Aurre (argazkian) Getxoko PPko presidentea eta udal taldeko bozeramaileak Sabin del Bado udal langilearen burua eskatu zuen atzo publikoki, EFE albiste agentziak jaso duenez. Popularrak Sabin del Bado Getxoko Udaleko Ogasun Arloko aholkulari juridiko berria izatea salatu zuen. Era berean, ostiralean burutuko den Udal Batzarrean PPk aurkeztuko den mozio batean Iñaki Zarraoa alkateari "ETA laguntzeagatik auziperatutako kideak kontratatzea" aurpegiratuko dio. Zarraoak gaur bertan erantzun du prentsaurrekoan, PPri "eskuin-muturreko planteamendua" izatea leporatuz eta errugabetasun-presuntzioa eta lanerako eskubidea zer edo zertarako daudela gogoratuz. Getxoko alkatearen arabera, popularrek "ez dute demokrazian sinesten".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun