Behatokiak euskararen telefonoaren webgunea aurkeztu du

Erabiltzailearen aurpegia
www.euskararentelefonoa.com webgune berria sortu du Hizkuntz Eskubideen Behatokiak, "herritarrari modu errazagoan bizipenak helarazteko modua abian" jartzeko asmoz, Paul Bilbao (argazkian) Behatokiko zuzendariak prentsa ohar baten bitartez jakinarazi duenez. Webgune berria hizkuntza-eskubideen urraketen edo zoriontzeen berri emateko tresna da. "Administrazioen, erakundeen, enpresen eta bestelakoen urraketen eta txalotzeen berri emateak hizkuntza-eskubideen egoera irudikatzen laguntzen gaitu", adierazi du Bilbaok. Orain arte, kexak, zoriontzeak edota argibide eskaerak 902 194 332 telefonoaren bidez edo Behatokiaren webguneko atal batera bidal zitezkeen, baina erakundeak argitu duenez sistema berriak bildutako datuak "arinago" sailkatzea bermatzen du.
Euskararentelefonoa.com webgunean erabiltzaileak era errazean egin ditzake nahi dituen kexak, zoriontzeak edo galderak, bere izena eman ostean. Arantza Haranburu Behatokiko kudeatzaileak emandako zehaztazunen arabera, erabiltzaileak nori egiten dion txalotzea edo zoriontzea argitu eta arrazoia azaldu beharko du. Gainera, kexa edo txalotzea ziurtatzeko dokumentua atxikitzeko aukera ere badu.

Euskararen telefonoaren proiektuak lau urte beteko ditu urte bukaeran eta epe horretan 3.000 espedientetik gora bideratu ditu. Euskararen telefonoa Behatokiak urtero argitaratzen duen txostenerako informazio-iturri garrantzitsua da. "Horren adibide argia Europako Adituen txostena dugu, bertan urraketa zehatzak erabili ahal izan genituen egoeraren berri emateko", gogoratu du Paul Bilbaok.
Irakurle agurgarria:

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda. Horretarako, jarri gugaz harremanetan administrazioa@hiruka.eus helbidera mezu bat idatziz edo beheko botoiari sakatuz.


Izan zaitez HIRUKAlagun