Pinuetakoek ere eskuratu ahal izango dute aparkatzeko tokia Gobela kiroldegian

Erabiltzailearen aurpegia
Getxoztar guztiek, administratiboki Leioako Udalari dagokion Pinueta auzoko bizilagunek (askotan eskatu dituzte aparkaleak) eta inguruetan lan egiten dutenek izango dute, hemendik aurrera, Gobela kiroldegiaren azpian dagoen parkingean tokiren bat eskuratzeko aukera. Izan ere, inguruko bizilagunei eskaini ostean, dauden 281 tokietatik 23 baino ez direla saldu ikusita, horiek esleitzeko baldintzak aldatzeko proposamena aurkeztu zuen, joan den ostiraleko udalbatzan, Getxoko Gobernu Batzordeak. Baita onartu ere; tokiko erakundeari babesa ematen dioten EAJ, EA eta EB-Berdeak taldeetako zinegotzien aldeko botoekin, bakarrik. 12.500 euro ordaindu eta gero, hurrengo 25 urtetan Gobelan aparkatzeko tokia erabiltzeko eskubidea eskuratuko dute, hasieran aipatutakoen artetik interesa duten guztiek (nahiz eta beste 25 urteko luzapen bi egin daitezkeen).
Getxoko PPk proposamenari aurka egiteko emandako argudioen artean, aparkatzeko tokien jabe direnei (edo izango direnei) horiek inguruko merkatariei alokatzeko aukera jaso beharko litzateke baldintzetan, Eduardo Andrade zinegotzi popularrak adierazi zuenez. Hori entzunda, "ondarearekin espekulatu" nahi izatea egotzi zion PPkoari Andres Uriarte Hirigintza zinegotziak. Andradek, ordea, "espekulatu" nahi izatea baino, euren asmoa "kale bazterretatik ahalik eta auto gehien kentzea" dela erantzun zion udal ordezkari jeltzaleari. "Horren premiazkoa ez da kontua. Aparkalekuen beharra badago, baina ez horrenbesterako. Bestela, Santa Eugeniako parkinga beteta egongo litzateke", adierazi zuen azkenean Uriartek. PSE-EE abstenitu egin zen.

San Eugenian alokatzerik egongo da

Santa Eugenian eraikitako parkingeko tokiak ere erabiltzaile gehiagori eskaintzea aztertzen ari da Getxoko Udala. Horrela, Iñaki Zarraoa alkateak joan den astean adierazitakoaren arabera, Gobelako kasuan aipatutako lagunei ere eskaintzeaz gain, “toki horien alokairua hilabeteka egitea ere aztertzen ari gara, kontuan hartuta, aparkatzeko lekuak erosi nahi duten bizilagunak egon ezkero, horiek lehentasuna izango luketela; alokairua ezeztatuko litzateke, behar izatekotan”. Egun, aparkatzeko 85 toki libre (204etik) daude libre bertan, "hirugarren solairua osorik", Zarraoak esandakoaren arabera. Santa Eugenian aparkatzeko tokia 50 urtez erabiltzeko eskubidea eskuratzen da 15.800 eta 18.600 euro bitarteko (azaleraren arabera) salneurria ordaindu eta gero.

Toki horiek esleitzeko baldintzen aldaketa alkatearen dekretuaren bitartez egingo litzateke, "udalbatzak horretarako baimena eman baitzuen bere garaian", Zarraoak adierazitakoaren arabera.
Irakurle agurgarria:

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda. Horretarako, jarri gugaz harremanetan administrazioa@hiruka.eus helbidera mezu bat idatziz edo beheko botoiari sakatuz.


Izan zaitez HIRUKAlagun