Premiazkoa zen ala ez eztabaidatzen hasi aurretik, "horrela ez hartzekotan mozioa hurrengo udalbatzarrera" eramango zuela argi utzi zuen Marisa Arrue Getxoko PPko bozeramaileak. Getxoko Gobernu Batzordearen izenean hitza hartu eta "premiazkoa ez" zela adierazi zuen orduan Iñaki Urkizak, "mozioak aurkezteko epean gertatutako gai bati buruzkoa ez delako" –Sabin del Bado pasa den irailaren 15ean sartu zen Ogasun Arloan, behin behineko funtzionario gisa, Iñaki Zarraoa alkateak sinatutako dekretua dela medio–. Hala ere, hori erabakitzeko bozketan abstenituko zirela iragarri zuen zinegotzi federalistak, "gaia delikatua delako". Sozialistek ere auza bera egingo zutela adierazi zuen Luis Almansa PSE-EEko bozeramaileak, baina tokiko gobernuaren jarrerari "ulergaitzat" iritzi zion, "gaia premiazkotzat jo ez arren, abstenituko direlako". Bitxia bada ere, bozketan bozkak banatu zituzten Gobernu Batzordea osatzen duten EAJ, EA eta EB-Berdeak taldeek eztabaida ahalbidetzeko.
Aldaketak
Bost minutuko etenaldiaren ostean, mozioa irakurri zuen Marisa Arrue Getxoko PPko bozeramaileak eta hainbat aldaketa egitea proposatu zion Luis Almansa PSE-EEko eledunak. "ETAko kide izateagatik" zioen esaldian "ustezko" hitza jartzea eta adostasun proposamenean ondorengo aldaketa egitea:
"Getxoko Udalak irailaren 15eko 4785/2005 zenbakiko dekretua ezeztatu eta lehen aipatutako langilearen kontratua bertan behera uztea", horrela proposatzen zuen PPk.
PSE-EEk, berriz: "Getxoko Udalak herritarren isilpeko datuekin lan egiten ez den beste sail batera aldatzea langilea".
PPk aldaketak onartu zituen, baina azkenean mozioak ez zuen aurrera egin Getxoko Gobernu Batzordea osatzen duten alderdiek (EAJ, EA eta EB-Berdeak) horren aurka bozkatu zutelako.
Irakurri Getxoko PPk aurkeztutako mozioa (pdf) osorik, hemen klik eginez.
Gaiaren inguruko berriak:
PPk Getxoko Udaletik langile bat bota nahi du 18/98 sumarioan auziperatuta egoteagatik (2005 Ira 28)
Bitxia suertatu zen, ostiraleko udalbatzan, Getxoko Gobernu Batzordea osatzen duten taldeek (EAJ, EA eta EB-Berdeak) nola bota zuten atzera Getxoko PPk aurkeztutako premiazko mozioa. "ETAko kide izateagatik auziperatutako" (sic) Sabin del Bado Getxoko Udaleko Ogasun Arloko aholkulari juridiko berriari "kontratua bertan behera uztea" eskatu zuten osoko bilkuran popularrek. Hala ere, mozioa premiazkoa zen ala ez erabaki behar zen lehendabizi eta, nahiz eta tokiko gobernuaren izenean Iñaki Urkiza zinegotziak (EB-Berdeak) premiazkotzat ez zutela jotzen aipatu, bozketan abstenituko zirela iragarri zuen; baita PSE-EEk ere. Kontua da, mozioa premiazkotzat hartzeko bozketan gehiengo osoa behar zela. Gauzak horrela, EAJ, EA eta EB-Berdeak taldeetako zinegotzien artean, gehienak abstenitu eta gutxi batzuk baiezkoa eman zuten, eztabaida ahalbidetzeko. Azkenean, sozialistek proposatu eta popularrek onartutako aldaketak tartean, PPk aurkeztutako mozioa bertan behera gelditu zen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun