Getxoko kai berriak ingurumenaren gaineko eraginaren azterketarik "ez du behar" Zarraoaren hitzetan
2005ko urr. 3a, 23:34
Transatlantikoentzako propio egiten ari den kai berriaren lanak gelditzeko Getxo Biziak aurkeztutako mozioari erantzunez, egitasmo horrek "ingurumenaren gaineko eraginaren azterketarik behar ez" duela adierazi zuen, joan den ostiraleko osoko bilkuran, Iñaki Zarraoa Getxoko alkateak. Ezker abertzaleko plataformaren izenean, Josu Amezagaren arabera, "legeak behar ez dela esan arren, zentzuak baietz diozku". Gaur egun egiten ari diren obrek eta kaian sartuko den itsasontzi kopuruak ekarriko dituzten "kalteez" ohartarazi zuen.Kai berriaren lanak gelditzea eskatu zuen ostiralean Getxo Biziak, ingurumenaren gaineko eraginaren azterketarik ez delako egin eta "beharrezkoak diren azterlanak, kokapen desberdin posibleei buruzko alternatiba azterketa eta herriari sor zaion eztabaida egin daitezen". Zarraoak erantzun zuenez, "ingurumenaren gaineko eraginaren azterketarik ez da behar. Gainera, eskumenik ez dugu horretan. Eta horren zentzuzkoa izango balitz, legeak aintzat hartuko luke". "Zuentzako izango da zentzuzkoa", aurpegiratu zion Josu Amezaga ezker abertzaleko plataformako hautetsiari.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun