"Zergak ez igotzea bezalakoa da" %3,3 gehiago ordaintzea, Sopelako Udalaren ustez
2005ko urr. 4a, 12:26
Nahiz eta EAJk osatzen duen Sopelako Gobernu Batzordeak gehiengo osoa izan, PSE-EEren aldeko botoak ere jaso zituen, osteguneko osoko bilkuran, 2006rako udal zergak %3,3 (Kontsumorako Prezioen Indizearen igoerarekin bat) igotzeko proposamenak. "Zergak ez igotzea bezalakoa da", adierazi zuten tokiko erakundeko kideek. Tasak ere beste horrenbeste egingo dute gora, zaramari dagokiona izan ezik. Horretan %6koa izango da igoera, "egindako txosten ekonomikoak aurreko tasarekin zerbitzuaren kostuaren %83ra baino ez ginela heltzen agerian utzi zuelako". "Egindako moldaketarekin, berriz, zerbitzuaren %90a ordainduko dute auzotarrek, eta Sopelako Udalak berak hartuko du beregain gainontzeko %10a", azaldu zuen Gonzalo Garcia Ekonomia eta Ogasun zinegotziak. (Argazkian, aurreko osoko bilkura bateko argazkia).Behin zerga eta tasa berriak onartuta, "zenbat diru daukagun jakin ahal izango dugu", 2006rako udal aurrekontuak egiteko, adierazi zuen Garciak. Gainera, Ogasun arduradunak azaldu zuenez, "aipatu aurrekontuak egiteko, udalbatza osatzen duten talde politiko guztiekin hitzegiteko konpromisoa hartu zuen bere garaian Gobernu Batzordeak. Horrela, guztiek partu dezaten udal kontuak lantzen". Tasa eta zergei dagokienez, "horiek gaurkotzea beharrezkoa da, herritarrei eskaintzen diegun zerbitzuetan maila egokia mantentzeko. Horiek 2006ko urtarrilaren 1etik aurrera egongo dira indarrean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun