"Ur zikin eta euri urentzako hoditeria eta erregistro-putzuen egoera ezin txarragoa dela ikusita", Astrabuduan saneamendu-sarea berrituko du erabat Erandioko Udalak. Besteak beste, urriko bigarren hamabostaldian hasiko dira lanak eta sei hilabetez luzatuko dira, "beti ere sortu daitezkeen ezbeharrak kontutan izanda", Asier San Nikolas Hirigintza zinegotziak atzo adierazitakoaren arabera. Hain zuzen ere, saneamendu-sarea horren egoera kaskarrean egotea da, udal arduradunaren hitzetan, "auzotarrek egunero sufritu behar izaten dituzten ixte eta usain txarren iturburua". "Arazo teknikoak ezezik, ingurumenaren gainekoak ere eragiten ditu horrek", San Nikolasek ziurtatu zuenez. Guztira, 435.366 euroko aurrekontua dute lanek. (Argazkia: Astrabuduako ia herrigune osoan izango dute eragina lanek; Etxegorri kalean, besteak beste).
Konponketa lanak egingo dituzten hamabost lekuek Astrabuduako ia herrigune osoa hartzen dute: Karl Marx, Bilboko Kontsulatua, Etxegorri, Meso, San Lorentzo, Ollaga, Atxutegi eta Kintone kaleetan, hain zuzen ere. Toki bakoitzean, hodietara loturiko erresgistro-putzuak berriztatu edo aldatuko dituzte. Horrela, dauden hutsak konpondu eta hartune bakoitza dagokion hodi biltzailera bideratzea ahalbidetuko da. Getxo kalean eta Txakurzuloko jaitsieran ere ur zikin eta euri urentzako hodi berriak jarriko dituzte. Orotara, 30 putzu, bi hodi zati eta euri urak hodi biltzailera bideratzeko 60 konexio berriztatu edo aldatuko dituzte. Lanek irauten duten bitartean, trafikoa moztuko da zatika zein osorik kale horietan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun