Santa Eugenia plaza azpian ere aparkatzeko tokia eskuratu ahal izango dute Pinuetakoek
2005ko urr. 5a, 21:22
Gobela kiroldegiko lurpeko parkingean bezala, Santa Eugenia plaza azpikoan ere getxoztar guztiek, administratiboki Leioako Udalari dagokion Pinueta auzoko bizilagunek eta inguruetan lan egiten dutenek izango dute, hemendik aurrera, kotxea uzteko tokia hartzeko aukera. Gainera, enpresa ustiatzaileak eskatutakoari jarramon eginez, lekuak libre dauden bitartean, horiek hilabete batzuetarako alokatzeko baimena ematea erabaki du Getxoko Udalak. “Horretarako aukera emango diogu enpresari, beti ere alokatzeko kontratuan argi eta garbi agertzen bada, 50 urtetako esleipena hartzeko itxarote zerrenda sortzekotan, kontratu hori bertan behera uzteko konpromisoa hartzen dutela bi aldeek”, argitu du gaur goizean emandako prentsaurrekoan Iñaki Zarraoak alkateak.Inguruko bizilagunei eskaini ostean, dauden 240 tokietatik 85 libre daudela ikusita, horiek esleitzeko baldintzak aldatzea onartu zuen atzo Getxoko Gobernu Batzordeak. Gobelako parkingaren kasuan ez bezala, Santa Eugeniakoan nahikoa izan da aipatu erakundeko ohiko bilera erabakia hartzeko, udalbatzari aurkeztu behar izan gabe. Izan ere, Zarraoak azaldutakoaren arabera, "horretarako ahalmena eman zitzaion udal gobernu taldeari, Santa Eugenia plaza azpiko parkingari buruzko baldintzak onartu ziren osoko bilkuran". 15.800 eta 18.600 euro bitarteko (azaleraren arabera) salneurria ordainduta eskuratzen da bertan aparkatzeko tokia 50 urtez erabiltzeko baimena.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun