Xabi Paia 22 urteko algortarra itzultzailea eta interpretea da lanbidez. Lehenengo aldiz kantatuko du Txapelketa Nagusian. Euskara maila hobetzeko aitzakian hasi zen bertsotan. Gaur egun, bertsoa, ikasi duen hizkuntza bat gehiago du. Zornotzako saioan, Iratxe Ibarra, Jon Martin, Miren Artetxe, Oihane Enbeita eta Oihane Perearekin neurtu beharko ditu indarrak.
Fredi Payak, berriz, 24 urte ditu eta bigarren Txapelketa Nagusia izango du aurtengoa. Musika ikasketak egin ditu eta enpresa zientzietako ikaslea da. Bizkaiko Txapelketako finalista azken hiru txapelketetan. Txapelketa, nahiz eta bertso munduak norbera neurtzeko toki injustua izan, hurrengo txapelketan finalerako hautagaia izan daitekeela frogatzera dator. Uztaritzen Amets Arzallus, Iñigo Manzisidor "Mantxi", Jokin Uranga, Julen Zelaieta eta Onintza Enbeitarekin lehiatu beharko da algortarra.
Epaile getxoztarra
Hala ere, payatarrak ez dira Uribe Kosta eskualdeko ordezkari bakarrak izango aurtengo Bertsolari Txapelketa Nagusian. Epaile lanetan, Joseba Santxo getxoztarra arituko da. 1993ko Txapelketa Nagusian hasi zen horretan. Harrezkero, edizio guztietako epaile izan da Algortako Bertsolari Eskolako (ALBE) arduraduna. Epai irizpideak gaurkotu eta egokitzeak dakarren erronkari ahalik eta hobekien erantzuteko intentzioa azaldu du taldeko beteranoenetakoak.
Igande honetan abiatuko da Lekunberrin Bertsolari Txapelketa Nagusia. Abenduaren 18ra bitartean, Barakaldoko BECen izango den finalerako txartela eskuratzen saiatuko dira, Euskal Herri osoan egingo diren kanporaketeran, txapelketan parte hartuko duten 38 bertsolariak. Baten batek kenduko ote dio hain ondo helduta daukan txapela Andoni Egañari? Paya anaiak saiatu egingo dira behintzat eta, algortar biek bertsotan daukaten trebezia ikusita, saria lortzea ez du hain erraz izango zarauztarrak. Txapela bitan banatzerik balego... edo hirutan, agian, parekorik ez duen Egañari ere zati bat emateko... Tamalez, gauzak ez dira horrela egiten. Besteak beste, urriaren 16an izango du kanporaketa, Zornotzako Zelaieta zentroan, Xabik (argazkian, ezkerrean) eta, urriaren 22an, Uztaritzeko Kiroleta pilotalekuan, Fredik (argazkian, eskuinean). Biak ala biak arratsaldeko bostetan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun