Joan Mari Larrarte Euskarazko Komunikazio Taldearen (EKT) ordezkariak, Iker Martinez de Lagos Topaguneko bozeramaileak eta Mikel Lizaso "Nabarra" aldizkariko bozeramaileak prentsa-agerraldia eskaini dute gaur Donostian, sektorearen egoera aztertu ondoren Eusko Jaurlaritzako Kultura Sailari eta Legebiltzarreko Taldeei egin dizkieten eskaerak azaltzeko, egun aurrekontuak negoziatzen ari baitira.
Lizasok azaldu du Eusko Jaurlaritzaren diru-laguntzen ordainketek "atzerapen handiak" izaten dituztela. Horrela, gaur egun oraindik ez dakite 2005eko diru-laguntzen zenbatekoa ez eta laguntza hori noiz jasoko duten ere. Horregatik, diru-laguntzen zenbatekoa urteko lehen seihilabetekoan jakin eta ordaintzeko modua egiteko galdegin diote Eusko Jaurlaritzako Kultura Sailari.
Halaber, Kultura Sailak euskaraz idatzitako hedabideei urtero ematen dien aurrekontu-saila 2000tik 3.800.000 eurokoa dela azaldu du. Kopuru horretatik 3.280.000 euro idatzizko prentsara zuzentzen da, eta Kontsumo Prezioen Indizea (KPI) ere ez dela igo kritikatu du.
Hedabideek "urrats handiak"
Lizasok esan du urte hauetan guztietan euskaraz idatzitako hedabideek "urrats handiak" egin dituztela, ekimen berriak sortu, lehengoak sendotu eta giza baliabideak hobetu baitira. "Hori guztia gure bitartekoekin egin behar izan dugu, bakoitzak jasotako diru-laguntzak gutxitzen joan diren bitartean", gaineratu du.
Euskara Biziberritzeko Plan Nagusiak euskaraz idatzitako hedabideen sektorea estrategikotzat jotzen duen arren, oraindik sendotasun maila nahikorik ez duela lortu eta laguntza publikoak ezinbestekoa dituela aitortu du.
Azkenik, euskarazko gainontzeko hedabideen egitasmoak (irratiak, ikus-entzunezkoak eta interneteko hedabideak) behar den neurrian babestuak izatea eta beraiek egiten dituzten eskariak aintzat hartuak izan daitezela ere eskatu diote.
Gaiaren inguruko berriak:
Diru-laguntzen esleipena eta kopurua sektorearen beharrizanetara egokitzeko eskatu diote idatzizko hedabideek jaurlaritzari (Topagunea)
UK aldizkariak euskaraz idatzitako hainbat hedabiderekin bat egin du Eusko Jaurlaritzari diru gehiago eskatzeko
Euskaraz idatzitako hainbat hedabidek milioi bat euro gehiago eskatu diote Eusko Jaurlaritzari mota honetako hedabideei zuzentzen den aurrekontu-sailean. Euskarazko hedabideek iritzi diote azken bost urteetan diru-laguntzek izan duten izoztea "ordaintzeko" modua izango litzatekela, eta etorkizunari gutxieneko bermeekin egingo liotekeela aurre. Gaur aurkezturiko eskaerekin bat egin duten hedabide eta elkarteen artean daude, besteak beste, "Aizu!", "Jakin", 'Elhuyar', Topagunea, "Nabarra", "Berria", "Bertsolari", "Argia", "Gaztetxulo", "Xirika", Durangaldeko "Anboto", Eibarko "...Eta kitto!", Soraluzeko "Pil-Pilean", Orioko "Karkara", Sakanako "Guaixe", "Hernaniko Kronika", Tolosako "Galtzaundi" edota "Herriko" Herri Komunikabideak Kooperatiba. Baita Uribe Kosta eskualdean plazaratzen den UK aldizkaria ere.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun