Abuztuaren 4ko Euskal Herriko Agintaritzaren Aldizkarian (EHAA) argitaratutakoaren arabera, euskara sustatzeko, garatzeko edota normalizatzeko laguntza eskatu duten Uribe Kostako lau egitasmoetatik hiru "ordezkotzat" jarri ditu Eusko Jaurlaritzako Kultura Saileko Hizkuntza Politikarako Sailburuordetzak, balorazioan beharrezkoak ziren 65 puntuak lortu ez dituztelako.
Besteak beste, Berbots Erandion Euskaraz! taldeak bultzaturiko Gazte Txokoa egitasmoa dago aisialdi-lanean diharduten taldeen ekintzetan euskararen erabilera areagotu eta sendotzea helburu duten ekimenen itxarote-zerrendan. Euskara elkarte erandioztarrak 62,45 puntu jaso ditu balorazioan eta lehenengo dago multzo horretan, baten batek kale egiten duen zain. Haur eta gazteen hizkuntza-gaitasuna sendotzeko eta erabilera areagotzeko asmoz antolaturiko berariazko ataleko "ordezko" egitasmoen zerrendan, berriz, Bizarra Lepoan Euskara Elkarteak sustatutako Gazte Txokoa (63,39 puntu), Getxoko gazteen euskara maila hobetzeko ekimena, eta Uribe Kostako Kontsumitzaileen Elkartearen (URKOA) gazteentzako aldizkaria (56,31 puntu) daude, lehengo eta bigarren, hurrenez hurren.
Milioi bat euro
Aurkeztutako 325 egitasmoetatik 87 bazterrean utzi eta 203 diruz lagundu ditu Eusko Jaurlaritzako Kultura Saileko Hizkuntza Politikarako Sailburuordetzak. Beste 35 ekimen, berriz, "ordezkoen" zerrendan daude (bakoitza dagokion multzoan), baten batek huts egin edo dagokion diruari uko egiten dion zain. Guztira, milioi bat euro banatu dituzte eta baliteke diru gehiago bideratzea euskara sustatzeko, garatzeko edota normalizatzeko laguntza eskatu duten egitasmoentzat. Izan ere, antzerki, dantza, musika eta zinearen arloetan jaialdiak, zikloak, lehiaketak eta sariketak antolatzeko diru-laguntzetarako, hasieran ezarritako diru-kopurua handitu egin du Eusko Jaurlaritzako Kultura Sailak.
Euskara sustatzeko Uribe Kostako lau egitasmotatik bakarra diruz lagunduko du Eusko Jaurlaritzak
Eusko Jaurlaritzako Kultura Saileko Hizkuntza Politikarako Sailburuordetzak uztailaren 14an hartutako erabakiaren (pdf) arabera, euskara sustatzeko, garatzeko edota normalizatzeko laguntza eskatu duten Uribe Kostako lau egitasmoetatik bakarrari baino ez diote emango dirua. Horrenbestez, Bapiruke ekimenerako 10.289 euro jasoko ditu Getxo udalerriko Bizarra Lepoan euskara elkarteak. Diru-laguntza eskatzeko baldintza guztiak bete arren, sosik gabe gelditu dira beste hiru egitasmoak: lehen aipatu taldeak berak aurkeztutako Gazte Txokoa egitasmoa, Berbots Erandion Euskaraz! elkarteak garatutako izen bereko proiektua eta Uribe Kostako Kontsumitzaileen Elkartearen (URKOA) gazteentzako aldizkaria, hain zuzen ere. "Ordezko egitasmotzat" jarri ditu hiruak Eusko Jaurlaritzak. Gauzak horrela, oraindik ere badute aukera txikiren bat laguntza bereganatzeko. Izan ere, bakoitzari dagokion atalean, beste ekimeneren batek huts egingo balu edo dagokion diruari uko egingo balio, itxarote-zerrendan dauden horien txanda izango litzateke. Balorazioan jasotako puntuen arabera banatuko litzateke dirua orduan eta, erandioztarrek zein getxoztarrek lehenengo sailkatuta daude, bakoitza bere multzoan. (Argazkian, Bapirukeren barruan antolatzen den surf ikastaroaren irudia).
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun