Sozialistek Bizkaiko Foru Aldundiari zein Eusko Jaurlaritzari Leioako metroko geltokia eta EHUko campusa lotuko dituen tranbiaren lanak "lehentasunezkotzat eta premiazkotzat" hartzeko eskatzea proposatuko dute. Hiruko Gobernuko alderdiek, berriz, errepide bidezko garraioa foru aldundien konpetentzia dela gogoratzea baino ez dute nahi.
"Kalitate urriko autobusak"
Abascal PPko legebiltzarkidearen aburuz, milaka dira egunero EAEko hainbat lekuetatik Leioaraino hurbiltzen direnak. Haietatik, arabarrek zein gipuzkoarrek "erosoago eta merkeago" bidaiatzeko konponbidea aspaldi aurkitu zuten, erabiltzaile elkarteetan antolatuz. "Horregatik, Bilbo metropolitanoko biztanleak dira oraingo zerbitzu eskasak kaltetuenak. Ikasleek, irakasleek eta langileek Bizkaibus eta Eusko Trenbideen artean aukera dezakete, baina erabiltzaile horiek kalitate urriko autobusak, maiztasun eskasa, ibilbide luzeak eta bidaia-txartelaren garestitzea salatzen dituzte. Horregatik, botere publikoen parte-hartzea behar da zerbitzua hobetzeko asmoz". Ildo horretan, Abascalek garraio hobea, merkeagoa eta maiztasun ugariagoa lortzeko "behar diren ekimen eta neurri guztietan buru izatea" eskatu dio Eusko Jaurlaritzari.
Alderdi Popularrak (PP) aurkeztutako legez besteko proposamenaren harira, Leioako campusak Bilbo eta inguruko herriekin dituen garraio loturak aztertuko dituzte bihar EAEko Eusko Legebiltzarrean. PPk gaur prentsa ohar baten bidez jakinarazi duenez, Santiago Abascalek defendatuko duen proposamenak Bizkaibus eta Eusko Trenbideen zerbitzuei kritika egiteaz gain "egunero EHUko Leioako campusera, lanera zein ikastera, hurbildu behar direnentzat garraioa kalitatean, ekonomian eta maiztasunean hobetzea" eskatzen du. PPren eskakizunaren aurrean osoko zuzenketak aurkeztu dituzte PSE-EEk zein hiruko Gobernuak. Argazkian, Leioako campuseko zerbitzua egiten zuen autobus batean matxura batek eragindako sutea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun