Emakumeen Mundu Martxaren bukaera dela eta, hainbat ekintza egingo dituzte astelehenean Algortan

Euskal Herriko Emakumeon mundu martxarako plataformaren oharra:

Urriak 17: Elkartasun feministako 24 ordu. Emakumeon eskubideen alde beti martxan. 7 Hilabete, 224, egun, 24 ordu

7 hilabete emakumeen mundu martxan, elkarrekin aurrera eginez, pausoz pauso, biolentzia sexistaren eta txirotasuna emakumezkotzearen aurka.

224 egun feminismoaren aldeko lanean, sareak ehuntzen, beste modu bateko mundu bat, emakume nahiz gizonezkoentzako askatasun espazioak dituena, sor daitekeela pentsarazten diguten sareak ehuntzen, alegia.

24 ordu elkartasun feminista adierazten, bazterkeria sortzen duten, mendekotasuna indartzen duten, gure gorputzak kontrolatzen dituzten eta gure ametsak lapurtzen dizkiguten sistema neoliberal eta patriarkal guztien aurka.

Emakumeen Mundu Martxa Brasildik abiatu zen martxoaren 8an, eta 50 herrialdetan zehar ibili da, Euskal Herria barnean hartuta. Bidean, milaka emakume ibili ginen, milaka begiradak egin zuten topo, eta milaka ahotsek egin zuten bat munduari amorruz eta pasioz oihu egin eta oraindik planetaren erdia baino apur bat gehiagori zerbait zor diola esateko: emakumeen eskubideak aitortzea.

Urriaren 17an Martxak bere bidea amaituko du Burkina Fason, Afrikan, eta, horregatik, mundu osoko emakumeek Eguzkiak Lurraren inguruan betetzen duen zikloa jarraituko dugu: eguerdiko 12etan kalera irtengo gara eta txirotasunaren aurka, biolentziaren aurka eta diskriminazioaren arkako ordu beteko ekintzak burutuko ditugu.

Emakumeen Mundu Martxarako Euskal Herriko Plataformakoek dei egin nahi dizuegu ekintza sare hau gaur hemen gelditu ez dadin, eta animatu egin nahi zaituztegu Euskal Herriko emakumeen eskubide eta Aaldarrikapenen gutuna egiteko lanean eta horren gaineko eztabaidan parte hartzera.