Uribe Kostara heldu da Euskal Tonbola

Erabiltzailearen aurpegia
Enkarterriak, Ezkerraldea, Uribe Nerbioi eta Bilbora ezezik, Uribe Kostara ere iritsi da Euskararen Gizarte Erakundeen Kontseiluaren Euskal Tonbola. Dagoeneko Barrika, Berango, Erandio, Getxo, Gorliz, Leioa, Lemoiz, Plentzia, Sopela eta Urdulizko hainbat tabernetan daude salgai txartelak eta sariak ez dira batere makalak. "Euro baten truke hainbat sari jasotzeko aukera ematen du", azaldu du gaurko aurkezpenean Xabier Mendiguren Kontseiluko idazkari nagusiak. Besteak beste, Menditerraneoan zeharreko kruzero-bidaia, argazki kamera digitalak, asteburuak landetxeetan, sakelako telefonoak, talasoterapia sarrerak, MP3 irakurgailuak, afariak eta DVDak daude. "Bost txarteletatik bat sariduna da", ohartarazi dute. Baina sariak irabazteaz gain, euskara sustatzea da jokoaren helburua. Horretarako, txartel bakoitzean gizarteak eguneroko bizitzan hizkuntzaren alde egin dezakeen adibide bat txertatu dute. Argazkian, Xabier Mendiguren eta Iker Gomez –ezkerretik eskuinera– Bilbon gaur egindako aurkezpenean.
Euskal Tonbola eremu honetako Enkarterriak, Ezkerraldea, Uribe Kosta, Uribe Nerbioi eta Bilboko 200 tabernetan dago salgai. Bertan jarri dituzte herritarrekin gertutasuna lortzeko. Gainera, sariak tabernetan bertan utzi dituzte. "Bezeroek han bertan jasoko dituzte irabazitakoak", aditzera eman du Iker Gomez de Segura Kontseiluko finantzaburuak. Euskal Tonbolaren funtzionamendua oso erraza dela azpimarratu dute: "txartela hazkatu behar da sariaren izena ikusi ahal izateko, eta ondoren tabernariari irabazitakoa eskatu”.

Euskararen normalizazioan aurrera

Euskararen Gizarte Erakundeen Kontseiluak Euskal Tonbolarekin lortuko duen etekinekin euskararen normalizazioan aurrera egiteko proiektuekin jarraituko du. "Izan ere, norberen konpromisoak ere sustatzea gustatuko litzaiguke, horretarako, txartel bakoitzean gizarteak eguneroko bizitzan hizkuntzaren alde egin dezakeen adibide bat txertatu dugu", azaldu dute.

Euskal Tonbola Bizkaiko zenbait herritan ibilia da dagoeneko eta harrera oso ona izan du. “Arratian, Busturialdean, Durangaldean, Lea-Artibain, Txorierrin eta Uribe-Butroin izan gara orain arte eta harrera primerakoa izan da, milaka sari banatu ditugu", esan du Kontseiluko finantzaburuak.
Irakurle agurgarria:

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda. Horretarako, jarri gugaz harremanetan administrazioa@hiruka.eus helbidera mezu bat idatziz edo beheko botoiari sakatuz.


Izan zaitez HIRUKAlagun