Euskararen erabateko normalizaziora "eramango gaituen" politika horren legegintzaldiko lehen urtea izan behar duela uste du Kontseiluak. "Hori dela eta, datozen urteotan funtsezkoak izango diren lan ildoei hasiera egokia eman behar zaie 2006eko aurrekontuetan diru inbertsio duinak eginez", azaldu zuen atzo Gasteizen emandako prentsaurrekoan Kontseiluko idazkari nagusiak.
Kopuru horrek aparte uzten du administrazioa euskalduntzeko beharko litzatekeen diru kopuruaren kontaketa. "Kalkulu horretatik at utzi arren, oso kezkatuta gaude horien bidez gertatzen den eskubide urraketekin", aipatu zuen Iñaki Lasa Kontseiluko Ildo Politiko-Instituzionaleko arduradunak. Hori dela eta, epeak azkartzeaz gain, gutxienez ahalegina hirukoiztu egin beharko litzatekeela azpimarratu zuen.
Helburuak
Euskararen Gizarte Erakundeen Kontseiluak diru inbertsioen helburu orokorrak aipatu ditu, eta hauek dira:
1. Administrazioa euskalduntzea.
2. Lan mundua euskalduntzea.
- Lan Mundua euskalduntzeko Fundazioa sortzea
- Enpresetan normalizazio planak abia daitezen laguntza askoz handiagoak ematea.
- Enpresa berriak sortzen direnean euskaraz sor daitezen zerbitzuak eskaintzea.
3. Helduen euskalduntzearen laguntzak handitzea doakotasunaren bidetik. Helduen euskalduntzeari eta alfabetatzeari dagokien izaera estrategikoa ematea beharrezko baliabideak eskainiz eta helduei ikasteko erraztasunak emanez doakotasunaren bidetik.
4. Euskaraz egitasmo mediatiko berriak sortzeko laguntzak ematea eta daudenak egoki hornitzea.
5. Euskalgintzaren zereginak baldintza egokiagotan eta eraginkortasun handiagoarekin burutzeko behar diren diru laguntzak ematea.
Euskararen Gizarte Erakundeen Kontseilua
Euskararen Gizarte Erakundeen Kontseiluak Eusko Jaurlaritzari hizkuntza-politika eraginkorrago bat eskatu dio. "Aurrekontuetan 29,4 milioi euro gehiago behar du euskararen sustapenak", aldarrikatu du Xabier Mendiguren Kontseiluko idazkari nagusiak. Era berean, ohartarazi du gaur egungo inbertsioak guztiz "askiezak" direla. Euskararen normalizazioak ahalegin handiagoa behar du Euskal Autonomia Erkidegoko aurrekontuetan. "Eusko Jaurlaritzari baliabidez ongi hornitutako hizkuntza-politika eskatu nahi diogu, sektore guztietara iristeko modukoa", adierazi du Mendigurenek. Hau da, "Administrazio nagusitik toki administraziorainoko, sailartekoa eta gizarteko sektore guztietara iristeko modukoa". Argazkian, ezkerretik eskuinera, Xabier Mendiguren Kontseiluko idazkari nagusia eta Iñaki Lasa Kontseiluko Ildo Politiko-Instituzionaleko arduraduna atzo Gasteizen emandako prentsaurrekoan / Kontseilua.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun