Berriak azaldutakoaren arabera, hiru pieza nagusitan banatuta dago 18/98 auzia: Enpresak-Egin, Xaki, eta Ekin-Joxemi Zumalabe. Lehen atalak, Garzonek KASekin lotu zituen hainbat enpresa txiki eta Egin editatzen zuen Orain S.A. biltzen ditu. Horiek guztiak "ETAren finantzaketa saretzat" jo zituen epaileak. Nazioartean lan egiten zuen elkartea zen Xaki; Euskal Herriaren egoeraren berri Europan zehar emateko xedea zuena. "ETAren atzerri ministerio" izendatu zuen Garzonek. Independentzia eta sozialismoaren aldeko erakundea da Ekin. Helburu nagusi horiek alorrez alor lantzen ditu. Ekineko kideei, gainerako antolakundeetan "ETAren ordezkari gisa aritzea" egotzi zien epaileak. Joxemi Zumalabe Fundazioko kideak ere Ekinen atalean sartu zituen, desobedientzia zibilaren alde eginez Espainiako lege esparrua gainditu nahi izatea egotzita.
Uribe Kostako auziperatuak
Uribe Kostan hamar dira 18/98, 18/01 eta ondoko sumarioetan auziperatuta dauden lagunak: Algortako Maite Amezaga (18/98), Paul Asensio (Ekin), Mitxel Sarasketa (33/01-Amnistiaren Aldeko Batzordeak) eta Jose Luis Franco (Batasuna / Herriko Tabernak); Astrabuduako Aiboa Casares (18/01-Jarrai-Haika-Segi); Berangoko Jagoba Terrones (33/01-Amnistiaren Aldeko Batzordeak); Erandioko Xabier Oleaga (Euskaldunon Egunkaria); Leioako EHUko campuseko Kazetaritza Fakultateko irakasle kaleratua den Jexuxmari Zalakain (Egin); Urdulizko Izaskun Barbarias (Batasuna / Herriko Tabernak); eta Getxoko Udalean lan egiten duen Sabin Del Bado (Batasuna).
Gaiaren inguruko berriak:
59 auzipetuak azaroaren 21etik aurrera epaituko dituzte Madrilen - Berria.info (2005 Urr 29)
Azaroaren 21ean epaituko dituzte Asensio eta Zalakain, 18/98 sumarioaren barruan
Espainiako Auzitegi Nazionaleko Zigor Arloko 3. Aretoko epaimahaiak atzo eguerdian kaleratu zuen 18/98 sumarioaren autoa. Aste honetan Euskadi irratiak aurreratu duen bezala, epaiketa azaroaren 21ean hasiko dela baieztatzen da bertan. Guztira, 59 pertsona eseriko dira akusatuen aulkian. Datozen egunotan heleraziko zaie autoa horiei guztiei eta jasotzen ez duenak Auzitegi Nazionalean aurkeztu beharko du azaroaren 14an, epaiketarako astebete falta dela. Auziperatuen artean Paul Asensio algortarra eta Leioako EHUko campuseko Kazetaritza Fakultateko irakasle kaleratua den Jexuxmari Zalakain daude. Fiskalak 15 urteko zigorra eskatzen du lehenengoarentzat eta 48 urtekoa bigarrenarentzat. Asensiori Ekin taldeko kidea izatea leporatzen dio. Eta Zalakain Egin egunkariaren aurkako prozesuan kokatzen dute. Bestalde, 18/98 sumarioaren auto osoa eskura jarri du Etengabe.org-ek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun