Milioi bat euro inbertituko du Getxoko Udalak errepide eta espaloiak berritzeko
Getxoko Udalak 948.000 euro erabiliko ditu Algorta, Itzubaltzeta / Erromo eta Areetako espaloiak eta errepideak berritzeko. Iñaki Zarraoa alkatearen (argazkian) arabera, “lan hauek udalerriko irisgarritasuna eta gune batzuen baldintzak hobetuko dituzte”. Esleitutako lehenengo lanak espaloiak zabalduko ditu Algortako Salbatzailea eta Ereagako kaia kaleetan, hala nola, Itzubaltzeta / Erromoko Negubide, Aurrezki Kutxa eta Ezekiel Agirren. Lan hauetan 212.000 euro inbertituko dira eta 2006ko apirilerako amaituta egotea espero da. Bestetik, espaloiak zabalduko dira Algortako Aiboa, Bidezabal, Arene, Villamonte, Elizondo eta Basarrate kaleetan. Lan hauek 515.000 euroko aurrekontua dute eta zazpi hilabetetan egingo dira. Beraz, udarako amaituta egon beharko lirateke.
Era berean, errepideei dagokienez, 221.000 euro gastatuko dira errepideak zaharberritzeko Algortako Aiboa kalean, Neguriko etorbidean, Itzubaltzeta / Erromoko Kresaltsu kalean eta Areetako Pinudi kalean. Lanak udaberrirako amaituko dituzte. Azkenik, Getxoko Udalak udalerriko estolderia sarearen hobekuntza lanekin jarraitzen du. Oraingo honetan 103.000 euro inbertituko du horrelako lanak Areetako Mesedeetako Ama kalean egiteko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun