Algortan egongo ez den Segiren manifestazioan esku hartzeko eskatu dio Balzari PPk
2005ko aza. 10a, 22:01
Ustez Segik ostiral honetarako Algortan deitutako manifestazioa "debekatuko duen ala ez" azaltzeko eskatu dio Javier Balza Eusko Jaurlaritzako Herrizaingo sailburuari Carlos Urquijo PPko legebiltzarkideak (argazkian). Ordezkari popularrak adierazi duenez, "legez kanpo utzitako gazte erakundeak sinatutako kartelak agertu dira Getxo udalerriko hainbat kaleetan", "Contra la estrategia de guerra del PSOE" (sic) lelopean mobilizatzera deituz. Hala ere, UKBERRIk egiaztatu ahal izan duenez, inolako kartelik ez da ageri horrelakoak jarri ohi diren horma zein tabernetan. Galdetutako gazte mugimenduko zein ezker abertzaleko iturriek ere popularrak "okertuta" daudela aipatu diote komunikabide honi. "Segik deitutako manifestaziorik ez dago bihar Algortan. Kartel zahar bat ikusi eta erratu egingo ziren agian", azaldu dute.PPk hedabideei helarazitako prentsa ohar baten bidez jakinarazi duenez, ustezko manifestazioa "formalki nork deitu eta izapide hori bete duen ala ez" ezagutu nahi zuela adierazi dio Balzari Urquijok. Gauzak horrela, popularren hitzetan, ostiral honetan Algortan egingo litzatekeen mobilizazioa Segik deituta egongo balitz, aipatu erakundea "legez kanpo dago eta, hortaz, ezin du inolako ekitaldirik antolatu", legebiltzarkideak Barne sailburuari aipatu dionez. Horretaz gain, "manifestazioa debekatu eta Ertzaintzak esku hartuko duen" galdetu dio.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun