Algortan dozenaka lagunek egin zioten ongietorria Kaierari
2005ko aza. 11a, 10:48
Xumea bezain beroa izan zen atzo iluntzean, Algortan, Kaierari egin zitzaion harrera. Bibolin pieza hunkigarriaren ostean, Laura Mintegi idazle algortarraren hitzen eman zieten babes, 19:30ak aldera, Telletxe plazan elkartzen hasi ziren lagunei euren buruetan zebilzkien pentsamendu, iritzi eta sentimenduei. Izan ere, Mintegik berak adierazi zuenez, 18/98 eta ondoko sumarioen aurkako jarrera agertu eta horien ondorioz ematen ari den eskubide zibil eta politikoen urraketa salatzeko dabil Euskal Herrian zehar Kaiera. Fredi Payak botatako bertsoek ere bertan bildutakoak akuilatu zituzten dagoeneko betetzen hasiak diren orri txurietan euren olerkiak, idatziak eta sinadurak izkiriatzeko.Goizean EHUko Leioako campuseko ikasle, irakasle eta langileen txanda izan bazen, iluntzean Uribe Kostako txoko guztietatik etorritako dozenaka lagun batu ziren Algortako Telletxe plazan, 18/98 eta ondoko sumarioen aurkako jarrera agertu eta horien ondorioz ematen ari den eskubide zibil eta politikoen urraketa salatzeko. Izan ere, bertan jarrita zegoen eskualde osorako hitzordua, Algortako 18/98+ lantaldeak antolatuta. Bertan izan ziren Alderdien Legea dela eta legez kanpo utzitako ezker abertzaleko herri plataformetako hainbat ordezkarik, Getxo Biziako Josu Amezaga kasu. Baita euskal preso politikoen senide eta lagunak ere, euren aita-amen, seme-alaben, anai-arreben... argazkiak eskuan zituztela. Horretaz gain, inguruetako hainbat udal agintari ez ziren falta izan (Iñaki Zarraoa Getxoko alkatea, Mikel Arieta-Araunabeña Erandiokoa, Manu Etxebarria Ogasun zinegotzi getxoztarra...), ezta eskualdeko kultur, kirol eta gizarte esparruetako ordezkari ugari ere.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun